یەکێتی سەرپەرشتیاری بازنە و بەربژێرەکانی بۆ پەرلەمانی عێراق دەستنیشان دەکات

ئەمڕۆ شەممە، محەممەد دووشیوانی بە تۆڕی میدیایی رووداوی راگەیاند، "لە سەرووی خۆیەوە فەرمانێکی پێگەیشتووە بۆ سەرپەرشتیکردنی بانگەشە و هەڵبژاردن لە ناوچەی بادینان."

 

بە گوتەی محەممەد دووشیوانی، دەستنیشانکردنی سەرپەرشتیار لە ناوچەکان بەمجۆرەیە:

 

- قوباد تاڵەبانی، سەرپەرشتیاری سنووری هەولێر

- رەفعەت عەبدوڵڵا، سەرپەرشتیاری سنووری سلێمانی

- ئاسۆ مامەند، سەرپەرشتیاری سنووری كەركووک

- محەممەد دووشیوانی (حەمەسوور دووشیوانی) سەرپەرشتیاری سنووری بادینان

- شێخ ئەحمەدی نۆکان، سەرپەرشتیاری سنووری گەرمیان

- وەهاب هەڵەبجەیی، سەرپەرشتیاری سنووری هەڵەبجە

- میران محەممەد، سەرپەرشتیاری سنووری راپەڕین 

- ئاراس محەممەد ئاغا، سەرپەرشتیاری سنووری پارێزگای نەینەوا

 

بەپێی زانیارییەکانی تۆڕی میدیایی رووداو، ئەو کادیرانەی ئارەزووی خۆ بەربژێرکردنیان کردووە بۆ پەرلەمانتاری، سیڤییان پێشکێشی مەڵبەندەکانیان کردووە و ئەوانیش ناردوویانە بۆ مەکتەبی هەڵبژاردن. 

 

هەر بەپێی زانیارییەکان، چاوپێکەوتن لەگەڵ زۆربەی ئەو کەسانە کراوە کە دەیانەوێ خۆیان بەربژێر بکەن و دوای هەڵسەنگاندن، ژمارەی پێویستیان لێ جیادەکرێتەوە.

 

 

بەپێی ئەو زانیارییانەی تۆڕی میدیایی رووداو لە بەرپرسێکی باڵای یەکێتیی نیشتمانیی کوردستانەوە دەستیکەوتووە، ئەو کادیرانەی کە چاوپێکەوتنیان لەگەڵ کراوە و دەکرێت، دەبێ بۆ بەربژێربوون چەند مەرجێکی سەرەکییان تێدابێت، لەوانە: 

 

- زمانی عەرەبی بە باشی بزانێت

- کەسێکی لێهاتوو بێت لە رووی سیاسی و دەربڕینەوە

- کەسێکی کۆمەڵایەتی و ناسراوبێت و بتوانێت دەنگ کۆبکاتەوە

- حیزبی بێت

- پابەندبێت بە بڕیارەکانی سەرۆک و سەرکردایەتیی حیزبەوە

 

لەنێو بەربژێرەکانی یەکێتیی نیشتمانیی کوردستان بۆ هەڵبژاردنی داهاتووی پەرلەمانی عێراق، چەند کەسێک هەن کە لە خولەکانی پێشووتر پەرلەمانتار بوون، دیارترینیان: رێزان شێخ دلێر، هەرێم کەمال ئاغا، ئارێز عەبدوڵڵا، بڕیار رەشید و دیلان غەفوور.

 

رێزان شێخ دلێر، کە لە خولی چوارەم پەرلەمانتاری عێراق بوو بە رووداوی گوت: لەلایەن سەرکردایەتی یەکێتییەوە راسپێردراوە بۆ ئەوەی خۆی بۆ پەرلەمانتاری بەربژێر بکاتەوە.

 

بڕیارە 11-11-2025، هەڵبژاردنی ئەنجوومەنی نوێنەرانی عێراق، لە عێراق و هەرێمی کوردستان بەڕێوەبچێت.