بۆ ناساندنی جینۆسایدی کورد شاندێکی وەزارەتی کاروباری شەهیدان لە ئیسپانیایە

 

شاندەکەی وەزارەتی کاروباری شەهیدان و ئەنفالكراوانی هەرێمی کوردستان گەیشتوونەتە بارسێلۆنا؛ رۆژی 10ـی تەمموزی 2023، عادل مەلا ساڵح، گوتەبێژی وەزارەتەکە و ئەندام لە شاندەکە بە تۆڕی میدیایی رووداوی گوت، "ئامانجی سەرەکیی وەزارەتەکەمان ناساندنی جینۆسایدی گەلەکەمانە، بەتایبەت ئەنفال و کیمیاباران و جینۆسایدکردنی ئێزدییەکان؛ سەردانەکەشمان بە ئامانجی ناساندنی ئەو تاوانانەیە بە وڵاتانی جیهان."

 

عادل مەلا ساڵح گوتیشی، "دەمانەوێت هەوڵبدەین بۆ پاڵپشتی زیاتر و رەواییدان بە کەیسەکانی جینۆسایدی گەلی کورد؛ ئومێد وایە لەم کۆنفرانسەدا کاری گەورە بکرێت بۆ دانپێدانانی وڵاتان بە کەیسەکانی جینۆسایدی گەلی کورد."

 

شاندەکەی وەزارەتی كاروباری شەهیدان و ئەنفالكراوان لە عەبدوڵڵا حاجی مەحموود، وەزیر، بەرەڤان حەمدی، بریكاری وەزارەت و ژمارەیەك لە راوێژكاران و بەڕێوەبەرە گشتییەكانی وەزارەتەکە پێکهاتووە.

 

لە راگەیێندراوێکی وەزارەتەکەشدا لەبارەی سەردانی شاندەکە هاتووە، لە کۆنفرانسەکەدا رێکخراوی لۆبی سەنتەر پانێڵێک لە بارەی کەیسەکانی جینۆسایدی گەلی کورد لە چوارچێوەی چەند توێژینەوەیەکی یاسایی و بەڵگەییدا پێشکێش دەکات، کە بەهاوکاری وەزارەتی شەهیدان ئامادەکراوە.