لە ورمێ 10 قاچاخچیی زێڕ بە 205 ملیۆن دۆلار سزادران
رووداو دیجیتاڵ
لە پارێزگای ورمێ، چەند کەسێک بە تۆمەتی بەقاچاخبردنی دوو تۆن زێڕ دەستگیر کران. سەرۆکی دەسەڵاتی دادی پارێزگاکە دەڵێت، سزای پێبژاردنی 23 ترلیۆن تمەن و بەندکردنیان بۆ دەرچووە.
پێنجشەممە 09-10-2025، ناسر عەتەباتی، سەرۆکی دەسەڵاتی دادی پارێزگای ورمێی رۆژهەڵاتی کوردستان رایگەیاند، لە شاری ماکۆی سەر بە پارێزگاکە، 10 کەس بە تۆمەتی ''بەقاچاخبردنی رێکخراو''ی دوو تۆن زێڕی عەیار 24 و عەیار 18 دەستگیرکراون.
بەگوتەی ناسر عەتەباتی، دوای تەواوبوونی قۆناخی لێکۆڵینەوە، دادگە لەسەر دۆسیەکە بڕیاری داوە و سزای پێبژاردن و بەندکردنی بۆ سەرجەمیان دەرکردووە.
سەرۆکی دەسەڵاتی دادی ورمێ لەبارەی بڕی پێبژاردنەکە گوتی، "دەستگیرکراوان تێکڕا بە پێبژاردنی 23 ترلیۆن تمەن (نزیکەی 205 ملیۆن و 357 هەزار دۆلار) سزا دراون".
ناسر عەتەباتی راشیگەیاند یەکێک لە دەستگیرکراوان بیانییە و خەڵکی تورکیایە.
پارێزگای ورمێی رۆژهەڵاتی کوردستان بەهۆی هاوسنووریی لەگەڵ تورکیا، هەرێمی کوردستان و ئازەربایجان، وەک شوێنێکی ترانزێت بۆ قاچاخی کاڵا بەکاردەهێنرێت.