مەسرور بارزانی لەگەڵ شا و بەرپرسانی دیکەی بەحرەین کۆدەبێتەوە

 

رۆژی سێشەممە، 10-12-2024، مەسرور بارزانی، سەرۆکی حکومەتی هەرێمی کوردستان لەگەڵ شا حەمەد ئەل خەلیفە، شای بەحرەین، میر سەلمان بن حەمەد ئال خەلیفە، سەرۆکوەزیرانی وڵاتەکە، عەبدوللەتیف بن راشد ئەلزەییانی، وەزیری دەرەوە و شێخ ناسر بن حەمەد ئال خەلیفە، راوێژکاری ئاسایشیی نیشتمانی و فەرماندەی پاسەوانی شاهانەی وڵاتەکە کۆبووەوە. 

 

حکومەتی هەرێمی کوردستان رایگەیاند، "شای بەحرەین ستایشی پێشکەوتن و ئاوەدانی و دۆخی ئارامی و پێکەوەژیانی هەرێمی کوردستانی بە رێبەرایەتیی ژیر و حەکیمانەی سەرۆک مەسعود بارزانی کرد و ئامادەیی شانشینی بەحرەینی بۆ پشتیوانیکردنی هەرێمی کوردستان لە هەموو بوارەکاندا دەربڕی."

 

"لە بەرامبەردا سەرۆکی حکومەت سوپاس و پێزانینی هەرێمی کوردستانی بۆ پشتیوانیی و هاریکاریی بەحرەین نیشاندا." لە راگەیێندراوەکەی حکومەتدا هاتووە.

 

بەگوێرەی حکومەتی هەرێمی کوردستان تەوەری سەرەکی کۆبوونەوەکان جەختکردنەوە لە سەر گرنگیی پتەوکردنی پەیوەندییەکان، کردنەوەی کۆنسولخانەی بەحرەین لە هەرێمی کوردستان و دەستپێکردنەوەی گەشتی راستەوخۆی مەنامە - هەولێر بوو.

 

 

هەروەها گفتوگۆکردن لەبارەی پرۆژەی رێگەی گەشەپێدان و دوایین پێشهاتەکانی سووریا و ناوچەکە، تەوەرێکی دیکەی کۆبوونەوەکان بوون.