ئەو گەنجەی لە تەکیە ئاو بردی: چەند جارێک شایەتومانم هێنا

 

رۆژی چوارشەممە، ئالان هێمن، کە دانیشتووی تەکیەی چەمچەماڵە، بە هیوا حوسامەدین، پەیامنێری رووداوی گوت، "کاتی لافاوەکە هاتمە دەرەوە لەماڵەوە و ویستم بچمە مارکێت، بەڵام لەناکاو ئاستی ئاوەکە زیادبوو و ئۆتۆمبێلەکەمی لەگەڵ خۆیدا برد."

 

ئالان گوتی، "لافاوەکە نزیکەی 2000 مەتر ئۆتۆمبێلەکەمی لەگەڵ خۆی برد و بەهۆیەوە گیرم خوارد."

 

ئەو گەنجە دەڵێت، "ئاوەکە کێشامی بە شۆستەی شەقامەکە و توانای هەناسەدانم نەمابوو، زیاتر لە جارێک شایەتومانم هێنا."

 

ئالان هێمن دوای ئەوەی خۆی بە ستوونێکی کارەبادا دەگرێتەوە بۆئەوەی لافاوەکە زیاتر نەیبات لەگەڵ خۆی، هاونیشتمانییەک بە شۆفڵەکەی دەگاتە فریای و لە ئاوەکە دەریدەهێنێت.

 

ئالان باسی لەوە کرد، دوای دەرهێنانەوەی لە ئاوەکە هاونیشتمانییەک بردوویەتییە ماڵی خۆی و جلەکانی بۆ گۆڕیوە و گەرمی کردووەتەوە.

 

لە رۆژی یەکشەممەوە شەپۆلێکی بەهێزی بارانبارین باشووری کوردستانی گرتەوە. بەگوێرەی ئاماری کەشناسیی هەرێمی کوردستان، تەنیا لە 24 کاژێری رابردوودا لە سنووری چەمچەماڵ 127.1 ملـلیمەتر باران باریوە.