15 لایەنی سیاسیی کوردستان: ئەوەی لە حەلەب بەرامبەر کورد دەکرێت "کۆمەڵکوژییە"

 

 

پاشنیوەڕۆی ئەمڕۆ یەکشەممە، 11-1-2026، لە شاری هەولێر و لە بارەگای مەکتەبی سیاسیی یەکێتی نەتەوەیی دیموکراتی کوردستان (YNDK)، 15 حیزب و لایەنی سیاسیی کوردستان بۆ تاوتوێکردنی هێرشی چەکدارانی سەر بە "حکومەتی کاتیی سووریا" بۆ سەر گەڕەکە کوردنشینەکانی حەلەب کۆبوونەوە.

 

لە راگەیێندراوی کۆتایی کۆبوونەوەکەدا هاتووە: "ئەو هێرشانەی دەکرێنە سەر گەڕەکەکانی شێخ مەقسوود و ئەشرەفییە، کورد و پێکهاتەکانی دیکەی ناوچەکەی خستووەتە دۆخێکی زۆر سەختەوە. ئەوەی روودەدات جۆرێکە لە جێنۆساید دژی گەلەکەمان و هەموو پێکهاتە نەتەوەیی و ئاینییەکانی وەک ئاشووری، سریانی و ئێزدی."

 

حیزبە کوردستانییەکان هێرشەکان بە "پیلانێکی داڕێژراو" ناو دەبەن و پشتیوانی تەواوی خۆیان بۆ "بەرگریی رەوای گەلی کورد لە رۆژئاوای کوردستان" دووپات دەکەنەوە. 

 

هەروەها ئاماژە بەوە دەکەن کە بێدەنگ نابن و پەنا بۆ هەموو رێگەیەکی مەدەنی دەبەن بۆ گوشارخستنە سەر کۆمەڵگەی نێودەوڵەتی بە مەبەستی فریاکەوتنی کوردانی حەلەب.

 

لە بەشێکی دیکەی راگەیێندراوەکەدا، داوا لە نەتەوە یەکگرتووەکان، ئەنجوومەنی ئاسایش و رێکخراوەکانی مافی مرۆڤ کراوە، دەستبەجێ بێنە دەنگ و رێگری لە "لەنێوبردنی گەلێکی بێتاوان" بکەن. 

 

حیزبەکان دەڵێن: "بێدەنگیی نەتەوە یەکگرتووەکان بەرامبەر ئەم کارەساتە، پێچەوانەی هەموو بەها دیموکراتی و مرۆییەکان و جاڕنامەی جیهانیی مافەکانی مرۆڤە."

 

 

1- سنووردانان بۆ هێرشەکان و پاراستنی سەلامەتیی بێسەروشوێنکراوان.

2- گەڕانەوەی ئاوارەکانی شێخ مەقسوود و ئەشرەفییە و قەرەبووکردنەوەیان.

3- ڕێگریکردن لە هەر هەوڵێک بۆ گۆڕینی دیمۆگرافیای ناوچەکە.

4- گەیاندنی هاوکاریی بەپەلە بۆ ئاوارە و لێقەوماوان.

 

لە کۆتایی کۆبوونەوەکەدا، سوپاسی کەناڵەکانی راگەیاندنی کوردستان و زانایانی ئاینی کرا کە "رۆڵێکی نەتەوەییان گێڕاوە لە گەیاندنی دەنگی مەزڵومییەتی کورد و ریسواکردنی هێرشکاران."

 

 

1- کۆنگرەی نەتەوەیی کوردستان KNK.

2- یەکێتیی نیشتمانیی کوردستان.

3- بزووتنەوەی گۆڕان.

4- حزبی شیوعی کوردستان.

5- یەکێتی نەتەوەیی دیموکراتی کوردستان YNDK.

6- حزبی زەحمەتکێشانی کوردستان.

7- حزبی تێکۆشانی کوردستان.

8- بزووتنەوەی دیموکراتی گەلی کوردستان.

9- بەرەی گەل.

10- حزبی دیموکراتی بێت نەهرێن.

11- بزووتنەوەی رزگاریی دیموکراتی کوردستان.

12- حزبی پارێزگارانی کوردستان.

13- حزبی گەشەپێدانی تورکمانی.

14- حزبی رزگاریی کوردستان.

15- حزبی بونیادنانی دیموکراتی کوردستان.