ئێسکە گەورەکە بۆ توێژینەوە گوێزرایەوە مۆزەخانەى گەرمیان

 

11ى نیسانى 2024، ساڵح محەممەد سەمین، بەڕێوەبەرى شوێنەوار و کەلەپوورى گەرمیان بە تۆڕى میدیایی رووداوى راگەیاند، "ئەو ئێسکە گەورەیەى کە ماوەیەک لەمەوبەر لە گەرمیان دۆزرایەوە، لە زانکۆى سلێمانى وەرگیراوەتەوە و لە مۆزەخانەى گەرمیان دانراوە". 

 

ساڵح محەممەد گوتی، "دواى جەژنى رەمەزان تیمێکى هاوبەشی شوێنەوار و زانکۆى گەرمیان و زانکۆى سلێمانى توێژینەوە لەسەر ئێسکەکە دەکەن".

 

ئەو ئێسکە 27ى ئادار لەلایەن چەند هاونیشتمانییەکەوە لە شارۆچکەی سمودى سەر بە ئیدارەى گەرمیان دۆزرایەوە کە بەهۆى باران و دروستبوونى لافاو دەرکەوتبوو.

 

بەڕێوەبەرى شوێنەوار و کەلەپوورى گەرمیان گوتی، "چەند پشکنینێک بۆ ئەو ئێسکە دەکرێت تاوەکو بزانرێت تەمەنى چەندە و ئێسکى چى ئاژەڵێکە". 

 

درێژیی ئێسکەکە 80 سانتیمەتر و پانییەکەى 25 سانتیمەترە.