لە هەولێر تەقە لە ماڵی ئەندامێکی سەرکردایەتیی یەکێتی دەکرێت

نازەنین گۆران
 
رووداو دیجیتاڵ 

لە هەولێر تەقە لە ماڵی حاجی مەسیفی، ئەندامی سەرکردایەتیی یەکێتیی نیشتمانیی کوردستان دەکرێت؛ کوڕەکەی دەڵێت، "پاسەوانێکی باوکم برینداربووە."
 
ئەمڕۆ دووشەممە، 11-7-2022، سۆران حاجی مەسیفی بە تۆڕی میدیایی رووداوی راگەیاند، "بەرەبەیانی ئەمڕۆ کاژێر 2:05 خولەک، دەستڕێژی گولـلە لە ماڵەکەمان کرا و تاوەکو ئێستا نازانین ئەنجامدەرانی کێن." 
 
سۆران حاجی مەسیفی گوتیشی، "گولـلە بەر باڵی پاسەوانێکی باوکم کەوت، بەڵام شەو نەشتەرگەری بۆ کرا و ئێستا تەندروستی جێگیرە." 
 
بە گوتەی سۆرانی حاجی مەسیف، ئەوان گومان لە هیچ کەسێک ناکەن و دوژمنایەتییان لەگەڵ "هیچ کەسێکیشدا نییە." 

 
ماڵی ئەو ئەندامەی سەرکردایەتی یەکێتی لە گەڕەکی هەولێری نوێیە؛ سۆران حاجی مەسیف گوتی: "پۆلیس و ئاسایشمان ئاگادارکردووەتەوە و فەرمانی دادوەریان وەرگرتووە و ئەمڕۆ سەیری کامێراکانی چاودێری دەکەن و دەست بە دواداچوون دەکرێت."   
 
لەسەر رووداوەکە، ئومێد خۆشناو، پارێزگاری هەولێر بە رووداوی گوت، "ھێزە ئەمنیەکانم راسپاردووە بۆ ئەوەی بە زووترین کات تەقەکەرەکەی سەر ماڵی حاجی مەسیفی، ئەندامی سەرکردایەتیی یەکێتی بدۆزنەوە."