دادگای سلێمانی: سێوان و منداڵەکانی بە دەستی هاوژینەکەی سووتێنراون

 

 

دادگای سلێمانی دوای 16 دانیشتن بڕیاری دا کە دیار مەجید جێبەجێکاری سەرەکیی تاوانی سووتاندنی سێوان و سێ منداڵەکەیەتی و گوتی دەبێت لە سێدارە بدرێت.

 

قادر نووری، باوکی سێوانە و بە تۆڕی میدیایی رووداوی گوت، "سوپاسی خوا دەکەین کە بڕیاری لەسێدارەدانی ئەو تاوانبارەی دا و ئەمڕۆ زۆر خۆشحاڵ بووین و وادەزانین جارێکی دیکە ژیاوینەتەوە و داواش لە سەرۆکی هەرێم و جێگرەکەی دەکەین کە بڕیارەکە جێبەجێ بکەن".

 

بنار عادل پارێزەری دۆسیەکەیە و بەرگری لە بنەماڵەی سێوان دەکات کە دوای ساڵێک و نۆ مانگ لە پرۆسەی دادگاییکردن ئێستا خۆشحاڵن کە کەیسەکەیان بردووەتەوە.

 

بنار عادل، یەکێک لە پارێزەرانی کەیسی سێوان بە روداووی راگەیاند، "زۆر خۆشحاڵم کە توانیمان دادپەروەری پچەسپێنین و ماوەی ساڵێک و نۆ مانگە بەم دۆسیەوە خەریکین و دۆسیەکە بەم زووانە دەچێتە دادگای تێهەڵچونەوە و بەپێی یاسا پێداچوونەوەی بۆ دەکرێت و داوا دەکەین ئەوانیش بڕیاری لەسێدارەدان پەسند بکەن و سەرۆکی هەرێمی کوردستانیش بڕیارەکە جێبەجی بکات".

 

جیاواز لە خۆشحاڵیی ئەوان، بنەماڵەی دیار مەجید لە بڕیاری لەسێدارەدانی کوڕەکەیان نیگەرانن و پێیان وایە ستەمیان لێکراوە و بەڵگەکانی بێتاوانیی کوڕەکەیان پشتگوێ خراوە.

 

مەجید حەمید، باوکی دیارە کە سزای لەسێداردان بەسەریدا سەپێنراوە و بە رووداوی گوت، "دادگا ستەمی لە ئێمە کردووە و بڕیارەکە ستەمکارانە بووە و ئەو بەڵگانەیان نەخوێندووەتەوە کە ئێمە هەمان بووە و تیمی بەڵگە و تاوانی سلێمانی و چەمچەماڵیش گوتوویانە رووداوەکە خۆکوژی بووە و بەڵگەی دیکەش هەبووە کە حسابیان بۆ نەکراوە. بۆیە تانە لە بڕیارەکە دەدەین".

 

بڕیارە لە ماوەی دوو هەفتەی داهاتوودا سکاڵای پێداچوونەوە بە بڕیاری لەسێدارەدانی دیار لەلایەن بنەماڵەکەیەوە بچێتە بەردەم دادگای تێهەڵچوونەوە و لە ماوەی سێ بۆ چوار مانگدا ئەوانیش بڕیاری کۆتایی لە بارەیەوە بدەن.