لە لوڕستان کارەبای 59 فەرمانگە و دامەزراوەی حکومی بڕدرا

 

رۆژی دووشەممە،11ی ئابی 2025، شێرزاد جەمشیدی، بەڕێوەبەری جێبەجێکاری کۆمپانیای دابەشکردنی کارەبای پارێزگای لوڕستان لە رۆژهەڵاتی کوردستان رایگەیاند، لە چەند رۆژی رابردوودا 59 فەرمانگە و دامەزراوەی حکومی بەهۆی زیاد بەکارهێنانی کارەبا سزادراون و کارەبایان لەسەر بڕدراوە.

 

بەڕێوەبەری جێبەجێکاری کۆمپانیای دابەشکردنی کارەبای لوڕستان دەڵێت، پێوێستە  فەرمانگە حکومییەکان 20٪ کەمتر لە پار کارەبا بەکاربهێنن و لە کاتی کۆتاییهاتنی دەوام ئەو بڕە بگاتە 60٪.

 

شێرزاد جەمشیدی گوتی، بەمەبەستی کەمکردنەوەی بەکارهێنانی کارەبا، چاودێریکردن و بەدواداچوونی تیمەکانیان بەردەوام دەبێت.

 

جەمشیدی داوا لە هاووڵاتییان دەکات، بەکارهێنانی کارەبا کەمتر بکەنەوە، بۆ ئەوەی بتوانن کارەبای پێویست بۆ هەموو هاوبەشەکان لە شار و گوندەکانی سنووری لوڕستان دابین بکەن.

 

هۆشداریش دەداتە ئەو هاوبەشانەی کارەبای زیاتر لە پێویست بەکاردەهێنن و دەڵێت، رێکاری جیدی لە بەرامبەر ئەو کەس و لایەنانە دەگرنەبەر و ئەو هاوبەشانە سزادەدرێن.

 

سەرەتای ئەم ساڵ، عەباس عەلی ‌ئابادی، وەزیری وزەی ئێران رایگەیاند، "ناهاوسەنگیی زۆر لە کەرتی وزەی وڵاتەکەیدا هەیە و بەم زووانە ناتوانن کێشەکە چارەسەر بکەن"؛ جەختیشی کردەوە، پێشبینی دەکەن "کورتهێنانی کارەبا بۆ 25 هەزار مێگاوات بەرزبێتەوە."

 

ئێران و رۆژهەڵاتی کوردستان لە هاوینی ساڵی 2024ـەوە تووشی کێشەیەکی گەورەی کورتهێنانی گاز و کارەبا بوون و حکومەت ناچار بووە رۆژانە چەندین کاژێر کارەبا لەسەر ماڵان و کارگەکان ببڕێت.

 

بەشێکی بەرپرسانی ئێران، هۆکاری سەرەکیی کێشەکە بۆ بەکارهێنانی زیادی کارەبا لەلایەن خەڵک و فەرمانگەکانی ئەو وڵاتەوە دەگەڕێننەوە، بۆیە بەردەوام داوای هاوکاری لە خەڵک دەکەن، بەڵام بەشێکی دیکەش دان بەوەدا دەنێن لەم ساڵانەی دواییدا حکومەت وەبەرهێنانی پێویستی لە کەرتی وزەدا نەکردووە.