گەشتی پاییزە لە باڵەکایەتی سەرنجی گەشتیاران رادەکێشێت

 

چالاکیی پەروەردەیی، هونەری، وەرزشی و کولتووری تێدا بەڕێوەچوون؛ گەشتوگوزاری چۆمان بەهاوئاهەنگی لەگەڵ ئیدارەی سنوورەکە گەشتەکەی ئەنجامدا. ئامانج لێی راکێشانی سەرنجی گەشتیاران و بەکولتوورکردنی گەشتیاریی چوار وەرزەیە لە سنوورە. 

 

سوارە ئەکرەم، قایمقامی چۆمان دەڵێت، "بێگومان ئەوە شێوەیەکە لە بەبازاڕکردن کە گەشتیاری تەنیا بەند نییە بە وەرزی هاوین و بەشێکی بەهار، ئێمە لەو سۆنگەیەوە دوو ساڵە گەشتی پاییزە لە چۆمان ئەنجام دەدەین."

 

گەشتەکە دەرفەتی نمایشکردنی بەرهەم و کارە دەستییەکانیشی تێدا رەخسا. دەستڕەنگینانی چۆمانیش بەرهەم و کارە دەستییەکانیان لەنێو سروشت نمایش کرد.  

 

پەیمان میر ئەحمەد، بەشداربووی گەشتەکەیە و دەڵێت، "ئامانجمان ئەوەیە ئەو نانە سروشتی و کارە دەستییەی خۆمان پێشانی خەڵکی بیانی بدەین بۆ ئەوەی بێبەش نەبن لەو تام و چێژە." 

 

خەڵکی سنوورەکە و میوانانی شارەکانی دیکەش بەشدارانی ئەو گەشتە پاییزیە بوون. ئەوان چالاکی و گەشتی لەو جۆرە بەپێویست دەزانن. 

 

بەندی خالید، بەشداربووەکی گەشتەکەیە و باس لەوە دەکات، "بەڕاستی پاییز خۆی جوانە. باڵەکایەتی خۆی جوانە، ئێمەش حەزمان کرد لەنێو ئەو سروشتە جوانە بەشداربین و لە دەرەوەی باڵەکایەتیش خەڵکێکی زۆر هاتووە و شەو دەمێننەوە." 

 

بەشداربووان لە چێژی گەشتەکە تێر نەبوون و ئامادەکاری دەکەن بۆ مانەوەی شەو. جگە لە گرووپە شاخەوانییەکان، خەڵکی دیکەش شەوی درێژی پاییزی لەنێو سروشتدا بەسەردەبەن. 

 

کێوان سابیر، بەشداربووەکی دیکەی گەشتەکەیە و ئاماژە بەوە دەکات، "گەڕانەوە بۆ سروشت و ئەو ساردییەش چێژی زۆر تایبەتی هەیە. شەوان بەتایبەت کە ئاگر دەکەینەوە و لەدیار ئاگر دادەنیشین چێژە زۆرەکە لەوەدایە، بەڕاستی لەنێو ناخی سروشت داین."

 

گۆرانی گوتنی هونەرمەندانی سنوورکە و بازنەی خەڵکی بەشداربوو بە دەوری ئاگردا دوا چالاکیی رۆژی یەکەمی گەشتەکە بوون. گەشتەکە دوو رۆژ بەردەوام دەبێت و لە پلانی رێکخەرانیدایە ساڵانی داهاتوو فراوانتری بکەن.