لە ناوچە شاخاوییەکانی پارێزگای ئەردەخانی باکووری کوردستان بەفر باری

بەرەبەیانی ئەمڕۆ شەممە، 11ـی تشرینی دووەمی 2023، شەپۆلێکی بەفربارین بەرزاییەکانی چیای شاڤشات و زنجیرە چیای پۆسۆفی لە پارێزگای ئەردەخان گرتەوە. 

 

بەفرەکە لە ماوەیەکی زۆر کەمدا تەواوی ئەو ناوچە شاخاوییانە و رێگە سەرەکییەکانی نێوان ئەو پارێزگایەی باکووری کوردستان و هەرێمی دەریای رەشی سپیپۆش کرد. بەفرەکە ئاستەنگی بۆ شۆفێران لە هەندێک ناوچە دروستکرد، بە تایبەتی شۆفێرانی بارهەڵگر. 

 

تیمەکانی بەڕێوەبەرایەتیی رێگاوبانەکانی ئەردەخانیش رایانگەیاند، دەستیانکردووە بە پاککردنەوەی رێگەکان و رشتنی خوێ بۆ ئەوەی کێشەی هاتووچۆ نەهێڵن. 

 

10ـی تشرینی دووەمی 2023، بەڕێوەبەرایەتیی گشتیی کەشناسی تورکیا رایگەیاند، پلەی گەرما لە پارێزگای ئەردەخان بۆ خوار پێنج پلەی ژێر سفری سەدی دادەبەزێت و پێشبینی بەفربارینی کرد.

 

کەشناسی ئاماژە بەوە دەکات، لە رۆژانی داهاتوودا بەفر لە بەشی زۆری پارێزگاکانی دیکەی باکووری کوردستانیش دەبارێت.