تەرمی برایەکی فواد مەعسوم لە کۆیە بەخاک دەسپێردرێت

 

رۆژی 5ی ئەم مانگە، محەممەد مەعسوم لە بەریتانیا بەهۆی نەخۆشییەوە کۆچی دواییکرد، رۆژی چوارشەممە 12-1-2022، تەرمەکە لە فڕۆکەخانەی نێودەوڵەتیی هەولێرەوە گەڕێندرایەوە هەرێمی کوردستان، لە فڕۆکەخانە لەلایەن خێزان و دۆستانیانەوە پێشوازی لێکرا و رەوانەی کۆیە کرا.

 

ئەمڕۆ چوارشەممە 12-01-2022 تەرمی محەممەد مەعسوم لە مزگەوتی مەلای گەورە لە کۆیە نوێژی لەسەر کرا و دواتر بەرەو گۆڕستانی هەیبەت سوڵتان بەڕێکرا و لەوێ بەخاکسپێردرا.

 

ماوەیەک لەمەوبەر محەممەد مەعسوم بۆ وەرگرتنی چارەسەری سەردانی بەریتانیای کردووە، کەسێکی نزیک لە ماڵباتەکەی بە تۆڕی میدیایی رووداوی گوت، محەممەد مەعسوم خۆی نەخۆشبووە و کاتێکیش چووەتە بەریتانیا لەوێ تووشی کۆرۆنا بووە و کاریگەرییە نەرێنییەکانی کۆرۆنا هۆکار بووە بۆ گیانلەدەستدانی.

 

مەقسود مەعسوم، برای محەممەد مەعسوم لە فەیسبووکی خۆی رایگەیاند، بەهۆی بڵاوبوونەوەی ڤایرۆسی کۆرۆنا و بۆ پاراستنی سەلامەتی هەموو لایەک و پابەندبوون بە یاسا و رێنوێنییەکان، ماڵباتەکەیان پرسەی فەرمی دانانێن.

 

محەممەد مەعسوم لە ساڵی 1944 لە کۆیە لەدایکبووە، برای د. فوئاد مەعسوم، سەرۆککۆماری پێشووی عێراق و ئەندامی دەستەی دامەزرێنەرانی یەکێتیی نیشتمانیی کوردستانە. رۆژی 5-1-2022، لە یەکێک لە نەخۆشخانەکانی لەندەنی پایتەختی بەریتانیا کۆچی دواییکرد.