شارەوانیی هەولێر: داشکاندنی پارەی زبڵ و هەڵواسینی تابلۆ کۆتایی دێت

 

 

کاروان هادی، سەرۆکی شارەوانی هەولێر، ئەمڕۆ دووشەممە بە تۆڕی میدیایی رووداوی گوت، "29ی ئەم مانگە ئەو کاتە کۆتایی دێت، کە دیاریکراوە بۆ داشکاندنی کرێی فڕێدانی زبڵ و تابلۆ هەڵواسراوەکان، ئەوانەی دەیانەوێت سوودمەند بن، دەتوانن پێش ئەو کاتە سەردانی شارەوانی بکەن."

 

سەرۆکی شارەوانیی هەولێر گوتیشی، "بەشێک لەوانەی پارەیان لایە، ناوچەکانی پیشەسازی، نەخۆشخانەکان و شوێنە گشتییە هاوشێوەکانن، ئەوان گرێبەستیان لەگەڵ شارەوانیمان هەیە و دەتوانن لەو کاتەی ماوە سوود لە داشکاندنەکە وەربگرن."

 

سەرۆکایەتیی شارەوانیی هەولێر ئەمڕۆ رایگەیاند، دوای وادەی دیاریکراو لە داشكاندن لە کرێی خۆڵ و خاشاک، رسووماتی پیشەیی، هەڵواسینی تابلۆ و کرێچییەکانی شارەوانی، "هیچ داشکاندنێک ئەنجام نادرێت."