لایەنە عەرەبییەکان پێشنیازێکی یەکێتی لەسەر پۆستی پارێزگار رەتدەکەنەوە

یەکێتی داوای لە سێ هاوپەیمانێتییە عەرەبییەکە کردووە، دەستبەرداری پۆستی پارێزگار ببن و لە بەرامبەردا پۆستی وەزیری دادیان پێ دەدات، بەڵام لایەنە عەرەبییەکان لەسەر مانەوەی دۆخەکە بەم شێوەیە رازین و پێشنیازەکەیان رەتکردووەتەوە، ئێستا بە پڕۆژەی دوو ساڵ بە دوو ساڵیش رازی نین.

 

عەزام حەمدانی، سەرکردە لە هاوپەیمانیی عەرەبی بە رووداوی راگەیاند، "پێشنیازێک هەیە کە وەزیری داد بدرێتە عەرەب و لە بەرامبەردا پۆستی پارێزگار بە کورد بدرێت، پێم وایە حیزبە سیاسییەکان لە دانوستاندنەکانیان بابەتی لەو شێوەیە دەخەنەڕوو، بەڵام ئەم بابەتە دوو کاردانەوە هەیە، کاردانەوەی شەقامی عەرەبی و کاردانەوەی حیزبە عەرەبییەکان، شەقامی عەرەبی پەیوەستە بە پۆستی پارێزگار و سازشی لەسەر ناکات."

 

رووداو زانیویەتی لەم هەفتەیەدا هەموو لایەنە سیاسییەکان، کۆبوونەوەی دوو قۆڵی و سێ قۆڵییان ئەنجامداوە و هیچ رێککەوتن و نزیکبوونەوەیەک لەنێوانیان دروست نەبووە و تەنانەت داواکاریی زیاتریان ئاراستەی یەکدی کردووە. 

 

تورکش عوسمان، سەرکردە لە بەرەی تورکمانی عێراق دەڵێت، "پێشنیازەکەی بەرەی تورکمانی زۆرترین رازیبوونی نەرمی نواندنی لەسەرە کە داوا دەکات پۆستی پارێزگار و سەرۆکی ئەنجوومەن بەشێوەی خول لەنێوان پێکهاتەکان دابەشبکرێت، ئەم تائێستا پەسندە، چونکە لایەنەکان لەسەر داواکارییەکانیان سازش ناکەن."

 

پێکنەهێنانی ئیدارەی نوێی کەرکووک، رەنگدانەوەی لە شەقامی شارەکە دروستکردووە و زۆرینە داوا دەکەن ئەو پرسە چارەسەر بکرێت و نەهێڵدرێت کاریگەری لەسەر پێکەوەژیانی نێوان پێکهاتەکان دروست بکات. 

 

عەلی موحسین، قوتابیی زانکۆیە و دەڵێت، "ئێمە هەموومان براین، کورد، عەرەب و تورکمان، پەیاممان بۆ ئەوانەی دەیانەوێ نێوانمان تێک بدەن، ئەو کێشە نەتەوەییە لە ئێمە دووربخەنەوە و کێشەکانیان چارەسەر بکەن و ئێمە برای یەکدین و پەیوەندیمان پێیانەوە نییە." 

 

عەلی موفید، قوتابیی زانکۆیە، دەڵێت، "عەرەب حکومڕانیی کردووە، کورد حکومڕانیی کردووە، بەڵام تائێستا دەرفەت بە تورکمان نەدراوە، بۆیە ئومێدەوارین ئەمجارە بە ئێمە بدرێت و دڵنیابن برایەتی دەپارێزین و بە یەکسانی خزمەتی هەمووان دەکەین."

 

نزیکەی دوو مانگە لایەنە سیاسییەکانی کەرکووک لەسەر پێکهێنانی ئیدارەی نوێی کەرکووک رێکنەکەوتوون، بۆ کۆبوونەوەی هەفتەی داهاتووش کە لە بەغدا ئەنجام دەدرێت، هێشتا پڕۆژەیەکی هاوبەش دروستنەبووە.