هۆشداری لە پەککەوتنی تاکە سەنتەری چارەسەری نەخۆشییەکانی سینگ و هەناسە لە هەولێر دەدرێت

 

بەڕێوەبەری پێشووی سەنتەرەکە دەڵێت، خزمەتگوزارییەکان بەرەو نەمان دەچن. بەڵام تەندروستیی هەولێر جەخت دەکاتەوە کە پڕۆسەی چارەسەرکردن بەردەوامە.

 

سەنتەری سینگ و هەناسە لە کەسنەزان کە تاکە ناوەندی حکومییە لە هەولێر بۆ چارەسەری بێبەرامبەری نەخۆشیی سیل و هەناسە، لە دۆخێکی خراپدایە. ئەبوبەکر عەبدولڕەحمان، یاریدەدەری پزیشک و بەڕێوەبەری پێشووی سەنتەرەکە کە خانەنشین بووە، دەڵێت: "پێشتر نزیکەی 70 کارمەند بووین، بەڵام ئێستا نزیکەی 20 کارمەند ماونەتەوە. تاقیگەکە کارمەندی نییە و زۆربەی پشکنین و خزمەتگوزارییەکان راگیراون."

 

ئەو بەڕێوەبەرە پێشووە، هۆشداری دەدات لەوەی لەکاتێکدا باس لە بڵاوبوونەوەی ڤایرۆس لە جیهاندا دەکرێت، ئەم سەنتەرە پشکنینی تێدا نەماوە و نەخۆشەکان ناچار دەبن روو لە کەرتی تایبەت بکەن.

 

لە بەرانبەردا، سامان سلێمان، گوتەبێژی بەڕێوەبەرایەتیی گشتیی تەندروستیی هەولێر رایگەیاند، کێشەی کەمبوونی ستاف لە تەواوی دەزگا تەندروستییەکان هەیە و گوتی: "بەهۆی جێبەجێکردنی یاسای خانەنشینی، تەنیا لە سنووری تەندروستیی هەولێر زیاتر لە هەزار کارمەند و پزیشك و پەرستار خانەنشین بوون، ئەمەش کاریگەری هەبووە."

 

سەبارەت بە دۆخی سەنتەری کەسنەزان، گوتەبێژی تەندروستیی هەولێر رەتیکردەوە خزمەتگوزارییەکان راوەستابن و ئاماژەی بەوە کرد: "هیچ پشکنینێک رانەگیراوە، پزیشکی پسپۆڕ لەوێیە و چارەسەری پێویست پێشکێش بە هاونیشتمانییان دەکرێت، بەڵام کێشەی ستاف هەیە."

 

ئەم کێشەیە لەکاتێکدایە کە نەخۆشەکانی سیل پێویستیان بە چاودێریی ورد و بەردەوامە و پەککەوتنی ئەم سەنتەرە بارگرانییەکی زۆر بۆ هاووڵاتییان دروست دەکات.