عومەری سەید عەلی وەک رێکخەری گشتیی بزووتنەوەی گۆڕان دەمێنێتەوە

 

عومەری سەید عەلی، یەکێک لە نزیکترین هاوڕێکانی نەوشیروان مستەفا بووە و پێشتریش لەنێو یەکێتیی نیشتیمانی کوردستان زۆر لە پۆستە گەورەکانی وەرگرتووە.

 

چەند بەرپرسێکی گۆڕان، لەبارەی ئەدای عومەری سەید عەلی لە کارەکانیدا قسەیان بۆ رووداو کردووە و لەسەر کارەکانی لە ماوەی رابردوودا، رای جیاوازیان هەیە.

 

ئەوانەی رەخنەی لێدەگرن باوەڕیان وایە: کەسێکی نەرم بووە و لە میدیاکان دوورە و گوتاری سیاسی کەمبووە، هەروەها لە بڕیاردان خاوبووە.

 

ئەوانەیشی لەگەڵیدان، باس لەوە دەکەن: کەس وەکو عومەری سەید عەلی جێگەی متمانەی نەوشیروان مستەفا نەبووە و زیاتر لە 40 ساڵ دۆست و هاوڕێی بووە، لە هیچ دۆخێکدا بەجێینەهێشتووە و لە دەستپاکیدا بێ وێنەیە.

 

ئەوانەی پشتگیری عومەری سەید عەلی دەکەن لە سۆشیاڵ میدیا وەسڵی کرێی خانووی رێکخەرەکەیان بڵاودەکەنەوە، کە هێشتا کرێچیە، لەکاتێکدا ماوەیەکی زۆر بەرپرسی دارایی یەکێتی بووە و بەرپرسی بەشێکی زۆری سەرکردەکانی ئێستای یەکێتی و گۆڕان بووە.

لەبارەی ئەدای ماوەی رابردووشی، باوەڕیان وایە "ئەو هێمنی و سیاسەتکردنەی عومەری سەید عەلی، دەستکەوتی گەورەی بۆ گۆڕان هەبوو و، لە نەبوونیی نەوشیروا مستەفادا لە زۆر شت پاراستوویەتی".

 

لە ماوەی رابردوودا و دوای کۆچی نەوشیروان مستەفا (19-5-2017) کۆمەڵێک بەرپرس لە بزووتنەوەی گۆڕان دوورکەوتنەوە، کە دیارترینیان عوسمانی حاجی مەحموود و قادری حاجی عەلی و دواتریش ساڵح ژاژڵەیی بوون. 

 

بڕیاڕە شەممەی داهاتوو (14-9-2019) هەڵبژاردن بۆ رێکخەری گشتیی گۆڕان بکرێت و سەرەڕای ئەوەی باس لەوەدەکرێ رکابەری هەبێت لەوانە شۆڕش حاجی، بەڵام لە ئێستاوە پۆستی رێکخەری گشتی بۆ عومەری سەید عەلی نزیکە لە یەکلابوونەوە.

 

1974 بووەتە پێشمەرگ

1975 بووەتە ئەندامی سەرکردایەتیی کۆمەڵە 

1976 لەلایەن حکومەتی عێراق لە 11ی تەممووز سزای شەش ساڵ زیندانی بەسەردا سەپێنرا

1979 بەر لێبوردنی گشتی کەوت و ئازادکرا

دوای ئازادبوونی لەزیندان، بە ئەندامی سەرکردایەتیی کۆمەڵە و سەرکردایەتی یەکێتی ھەڵبژێردرا

1980 بەھۆی بۆردوومانی فڕۆکە، لە بناری کێوەڕەش بریندار بووە و بۆ وەرگرتنی چارەسەر رەوانەی سوێد کرا 

1992 بووەتە ئەندامی پەرلەمانی کوردستان 

ماوەیەک بەرپرسی مەکتەبی دارایی یەکێتی بووە

نەوشیروان مستەفا کاتێک بۆ وەرگرتنی چارەسەری پزیشکی لە بەریتانیا بوو لە 2016 و پێش کۆچی دوایی، بریکارنامەیەکی گشتیی بۆ عومەری سەید عەلی کرد، بۆ ئەوەی کارە یاساییەکانی گۆڕان رابپەڕێنێت 

لەدوای کۆچی دوایی نەوشیروان مستەفاوە تاوەکو ئێستا، رێکخەری گشتیی گۆڕانە