ئاسایشی سلێمانی تەقەکەرەکانی ئاهەنگێکی گۆرانیگوتن لە چەمچەماڵ دەستگیر دەکات

 

ئەمڕۆ سێشەممە، 12-09-2023، هێزەکانی بەڕێوەبەرایەتیی ئۆپەراسیۆنەکان و بەڕێوەبەرایەتیی ئاسایشی رۆژئاوای سلێمانی سەر بە دەزگای ئاسایشی هەرێمی کوردستان، شەش چەکداریان دەستگیر کرد کە "تەقەکەر و ئاژاوەگێڕ" بوون و لە ناحیەی شۆڕشی سنووری چەمچەماڵ لە باخێکدا تەقەیان کردووە، ئەوەش ببووە هۆی بڵاوکردنەوەی ترس و دڵەڕاوکێ.

 

لە راگەیێندراوەکەی ئاسایشدا هاتووە، تۆمەتبارەکان "پێشینەی تاوانیان هەبووە و دەستگیرا بەسەر چەندین پارچە چەکی بێ مۆڵەت و سەدان فیشەک و هەشت (صمامی) گولەی هاوەن."

 

ئەو چەکدارانە شەوی دووشەممە، 11ـی ئەیلوولی 2023 لە ئاهەنگێکدا تەقەیان کرد، دواتر چەند هاونیشتمانییەک سکاڵایان کرد و ئاسایش دەڵێت، لەسەر داوای ئەو هاونیشمانییانە بەدواداچوونیان کردووە و تەقەکەرەکانیان دەستگیر کردووە.

 

ئاسایشی سلێمانی دەڵێت، "لەکاتی جێبەجێکردنی فەرمانی دادگە بۆ دەستگیرکردنی تۆمەتباران، بە چەک رووبەڕووی هێزەکانمان بوونەوە و سەرئەنجام دەستگیرکران و بە بڕیاری دادوەر بە ماددەی (156) لە یاسای سزادان راگیران و لێکۆڵینەوە لە دۆسیەکانیان بەردەوامە."

 

ئەو تۆمەتبارانە لە شەوی 11-09-2023، دەستگیر کران. دەزگای ئاسایشی هەرێمی کوردستان "سوپاسی هاوکاری و پشتیوانیی هاووڵاتییان دەکات لەپێناو زیاتر بەرقەراربوونی ئاسایش و ئارامی، بۆ چەسپاندنی یاسا."