باڵیۆزخانەی ئەمریکا لە عێراق: هەوڵی جێگیرکردنی سیستمی بەرگری بۆ پاراستنی ژێرخانی هەرێمی کوردستان دەدەین

 

 

رۆژی پێنجشەممە 11-12-2025، جۆشوا هاریس، هەڵسوورێنەری کاروباری باڵیۆزخانەی ئەمریکا لە گفتوگۆیەکدا لەگەڵ چەند دەزگەیەکی راگەیاندن لە بەغدا کە زیاد ئیسماعیل، پەیامنێری رووداویش ئامادەی بوو، رایگەیاند: "دوورخستنەوەی میلیشیاکان و گرووپە تیرۆریستییەکان کە لەلایەن ئێرانەوە پاڵپشتی دەکرێن" لە حکومەتی داهاتووی عێراق، مەرجێکی بنەڕەتییە بۆ پاراستنی "هاوبەشیی ستراتیژی؛" هەروەها داوای لە دەسەڵاتدارانی عێراق کرد رووبەڕووی هەوڵەکانی تاران ببنەوە "بۆ پارەدارکردنی نایاسایی و دزینی سامانی عێراق".

 

 

کۆتایی تشرینی دووەم، کێڵگەی گازی کۆرمۆر لە سنووری پارێزگای سلێمانی کرایە ئامانج. هێرشەکە زیانی بە کۆگەیەک گەیاند و نزیکەی 80٪ـی بەرهەمهێنانی کارەبای هەرێمی کوردستانی بۆ چەند رۆژێک پەکخست.

 

فەلاح مستەفا، یاریدەدەری سەرۆکی هەرێمی کوردستان بۆ کاروباری دەرەوە، رۆژی 13-212-2025 لە هەڤپەیڤینێکدا لەگەڵ سەنگەر عەبدولڕەحمان، پێشکێشکاری تۆڕی میدیایی رووداو رایگەیاند، نێچیرڤان بارزانی، سەرۆکی هەرێمی کوردستان داواکارییەکی فەرمی ئاراستەی ئەمریکا کردووە بۆ دابینکردنی سیستمی بەرگری.

 

فەلاح مستەفا بە رووداوی گوت: "سەرۆکی هەرێمی کوردستان بە فەرمی داوای سیستمی بەرگری لە ئەمریکا کردووە. واشنتن وەڵامی داواکارییەکەی دایەوە و رایانگەیاندووە کە هەوڵدەدەن ئەو سیستمە لە عێراق و هەرێمی کوردستان دابمەزرێنن."

 

دیپلۆماتەکەی ئەمریکا لە بەغدا دووپاتی کردەوە کە واشنتن سەرکۆنەی ئەو "هێرشە تیرۆریستییە قێزەونە" دەکات و گوتی، لەگەڵ حکومەتی هەرێمی کوردستان و حکومەتی فیدراڵی لە پەیوەندیی بەردەوامدان و کاردەکەن بۆ "ناردنی ئەو سیستمانەی کە ژێرخانی هەستیار دەپارێزن، بۆ بەرەنگاربوونەوەی هەڕەشەکانی ئێران و بریکارەکانی کە بە مووشەک و درۆن هەڕەشە لە سەقامگیری و هاوکاریی ئابووری دەکەن."

 

هاریس ئاماژەی بەوە کرد، پێویستە سەرچاوەی کێشەکە چارەسەر بکرێ کە بریتییە لە: "بڵاوبوونەوەی توانای سەربازی لە دەستی میلیشیاکانی سەر بە ئێران کە هەڕەشە لە سەلامەتیی ئەمریکی و عێراقییەکان دەکات."

 

هاریس گوتی: "واشنتن زۆر روون بووە لەوەی بە زووترین کات ئەو گرووپانە چەک بکرێن."

 

 

عێراق لە مانگی تشرینی دووەم هەڵبژاردنی کرد و لایەنەکانی چوارچێوەی هاوئاهەنگی زۆرینەی کورسییەکانیان مسۆگەر کرد کە بەشێک لە حیزبەکانی نێو چوارچێوەکە باڵی سیاسیی گرووپە چەکدارەکانن و لەلایەن واشنتنەوە سزایان لەسەرە (وەک بزووتنەوەی سادیقوونی نزیک لە عەسائیب، حقوقی نزیک لە کەتائیب حیزبوڵڵا و هاوپەیمانیی خزمەتی نزیک لە کەتائیب ئیمام عەلی).

 

بەرپرسی کارەکانی ئەمریکا مەرجەکانی واشنتنی بۆ هاوکاریی عێراق بە ڕوونی خستەڕوو و گوتی: "زۆر بە روونی بە هاوبەشە عێراقییەکانمان گوتووە: بەشداریکردنی میلیشیاکان یان گرووپە تیرۆریستییەکان لە حکومەتی داهاتووی عێراقدا لەگەڵ هاوبەشیی بەهێزی ئەمریکا و عێراق یەکناگرێتەوە. هەنگاوێکی لەو شێوەیە مەترسی دەخاتەسەر پەیوەندییە ستراتیژییەکە."

 

هاریس گوتی: "هاوبەشە عێراقییەکانمان باش لەوە تێدەگەن، چ شتێک بەرەو پێشمان دەبات یان نابات."

 

دیپلۆماتە ئەمریکییەکە ئاماژەی بەوەدا، گفتوگۆ بەردەوامەکانیان لەگەڵ بەرپرسە عێراقییەکان سەرنجیان لەسەر "پێویستیی هەنگاوێکە کە عێراق سەرکردایەتی بکات بۆ ئەوەی ئەو میلیشیا و گرووپە تیرۆریستییانە چەک بکرێن کە سەروەریی عێراق تێکدەدەن، هەڕەشە لە ئێمە و عێراقییەکانیش دەکەن" و خزمەت بە "ئەجێندای بیانی" دەکەن.

 

لەوەڵامی پرسیارێکدا کە ئایا ئەمریکا هێزی سەربازی بەکاردەهێنێت ئەگەر بکرێتە ئامانج، هاریس گوتی: "ویلایەتە یەکگرتووەکان هەمیشە و لە هەموو شوێنێک هەر رێکارێک پێویست بێت بۆ پاراستنی بەرژەوەندییەکانی دەیگرێتەبەر. سەرۆک ترەمپ زۆر روون بووە و دیدگەی خۆی بۆ ئاشتی لەڕێگەی هێزەوە خستووەتەڕوو."

 

لەبارەی چالاکییە ئابوورییەکانی ئێران لە عێراق، واشنتن رەخنەی هەیە و تاران بەوە تۆمەتبار دەکات کە "دەیەوێ سامانی عێراق بدزێ" بۆ پارەدارکردنی ناسەقامگیری لە ناوچەکە.

 

 

سەبارەت بە گفتوگۆکانی پێکهێنانی کابینەی دەیەم، بەرپرسی کارەکانی ئەمریکا رایگەیاند، واشنتن لە نزیکەوە چاودێری دەکات و گوتی: "پێویستە ئەم گفتوگۆیانە بە خێرایی بەڕێوە بچن."

 

هاریس ستایشی "هاوبەشییە زۆر تایبەتەکەی" لەگەڵ هەولێر کرد و رۆڵی سەرکردایەتیی کوردی بە "گرنگ" ناوبرد.

 

کۆتایی مانگی ئەیلوول، بە ئاسانکاریی ئەمریکا، رێککەوتنێکی سێقۆڵی لەنێوان هەولێر، بەغدا و کۆمپانیا بیانییەکان کرا بۆ دەستپێکردنەوەی هەناردەی نەوت.

 

هاریس پشتڕاستی کردەوە کە رێککەوتنەکە هەنگاوێکی گرنگە، بەڵام ئاماژەی بەوەشکرد: "هەندێک بەرپرس لە وەزارەتی نەوتی عێراق زنجیرەیەک رێکاریان گرتووەتەبەر کە بوونەتە هۆی رێگریکردن و پەکخستنی جێبەجێکردنی ئەو رێککەوتنە."

 

گوتیشی: "ئێمە لە گفتوگۆی کاراداین لەگەڵیان و بابەتەکە پێویستی بە گرنگیپێدانی بەپەلە هەیە. چاوەڕوانین هاوبەشە عێراقییەکانمان پابەندی ئەو بەڵێنانە بن کە داویانە."