دوایین زانیاری لەبارەی ئاگری پاڵاوگەکەی هەولێر؛ 'نایاسایی و بێ مۆڵەت بووە'

 

ئاگری پاڵاوگەکەی سەر رێگەی هەولێر- گوێڕ لە شەوی رابردووەوە بەردەوامە و کۆنترۆڵ نەکراوە. ئاگرەکە سێ پاڵاوگە و کۆگەی قیر و سووتەمەنیی سووتاندووە.

 

پەیامنێری رووداو دەڵێ "10 کەس بەهۆی ئاگرەکەوە بریندار بوون، برینی یەکێکیان سەختە."

 

ئاگرەکە زیانی زۆری مادیی هەبووە و جگە لە سووتانی پاڵاوگە و کۆگەی سووتەمەنی، بووەتە هۆی سووتانی سێ ئۆتۆمبێلی تیمەکانی بەرگریی شارستانی و 5 تانکەری سووتەمەنی.

 

 

ئەو زیانە مادییانە لەکاتێکدان؛ بەهۆی گەورەیی و تەوژمی ئاگرەکە، لە شەوی رابردووەوە بەردەوام تیمەکانی بەرگریی شارستانی لە هەوڵدان بۆ کۆنترۆڵکردنی و 40 تیمی ئاگرکوژێنەوە لە شوێنی رووداوەکە بوون.

 

چەند ئەفسەرێکی بەرگریی شارستانیی هەولێر لە شوێنی ئاگرەکەوە بە فەرهاد دۆڵەمەری، پەیامنێری رووداویان گوت "ئەو پاڵاوگەیە نایاسایی بووە، مۆڵەتی کارکردنی نەبووە و هیچ رێنماییەکی بەرگریی شارستانیی تێدا جێبەجێ نەکراوە."