رێخکەری سەنتەری میترۆ: کاک بافڵ پێیگوتم ئاگاداری دۆسیەی دەستگیرکردنی شاسوار عەبدولواحید نییە

 

رۆژی چوارشەممە، 13ـی ئابی 2025، رەحمان غەریب، رێکخەری سەنتەری میترۆ بۆ داکۆکی لە مافی رۆژنامەنووسان، بە تۆڕی میدیایی رووداوی راگەیاند: "ئەمشەو لەگەڵ چەند هاوڕێیەکی دیکەماندا لە مەراسیمی ناساندنی کۆنسووڵی نوێی ئەمریکا چاومان بە کاک بافڵ تاڵەبانی کەوت، چەند پرسیارێکمان لێیکرد و یەکێک لە پرسیارەکانمان پەیوەندیی بە دەستگیرکردنی شاسوار عەبدولواحیدەوە هەبوو."

 

بە گوتەی رەحمان غەریب، سەرۆکی یەکێتیی نیشتمانیی کوردستان لە وەڵامی پرسیارەکەیدا سەبارەت بە کەیسی سەرۆکی جووڵانەوەی نەوەی نوێ گوتوویەتی: "من ئاگام لە کەیسی دەستگیرکردنی شاسوار عەبدولواحید نییە، بۆ پرسیار لە من دەکەن؟"

 

رێکخەری سەنتەری میترۆ گوتی: "ئەمشەو کاک قوباد تاڵەبانی و دەرباز کۆسرەت رەسوولیش لە مەراسیمەکە ئامادەبوون."

 

دوێنێ سێشەممە، 12-8-2025 کاژێر 10:00ـی شەو، شاسوار عەبدولواحید، سەرۆکی جووڵانەوەی نەوەی نوێ، دەستگیر کرا.

 

د. مونا یاقوو، سەرۆکی دەستەی سەربەخۆی مافەکانی مرۆڤ، ئەمڕۆ بە رووداوی گوت: "سەردانی سەرۆکی جووڵانەوەی نەوەی نوێم لە زیندان کردووە، تەندروستیی زۆر باشە و رێگە بە کەسوکاریشی دراوە سەردانی بکەن."

 

د. مونا یاقوو گوتی: "شاسوار عەبدولواحید خۆی دووپاتیکردەوە کە مامەڵەی باشی لەگەڵ دەکرێت و لەسەر هەندێک بابەتی یاسایی دەستگیر کراوە."

 

ئەمە لە کاتێکدایە ئەمڕۆ، رێبوار عەبدولڕەحمان، پەرلەمانتاری فراکسیۆنی نەوەی نوێ لە پەرلەمانی عێراق، لە کۆنفرانسێکی رۆژنامەوانییدا رایگەیاند، دۆسیەکەی شاسوار عەبدولواحید "سیاسییە و یاسایی نییە"؛ گوتیشی: "ئەم دۆسیەیە لە بەرامبەر بڵاوکردنەوەی ڤیدیۆیەکی سەرۆکی جووڵانەوەکەمانە کە تێیدا ئاماژەی بەوە داوە، ئەگەر تاوەکو هەفتەی داهاتوو ئەو رێککەوتنەی لەگەڵ بەغدا واژوویان کردووە جێبەجێی نەکەن، کە تایبەتە بە رادەستکردنی نەوت و داهاتی نانەوتی، ئەوا نەوەی نوێ هەڵوێستی دەبێت."