لە کەرکووک پۆستەری بەربژێران دەشێوێنرێن؛ بەربژێرێکی پارتی بە تیپ چاکیان دەکاتەوە

 

هێمن مۆفەق، ئەو بەربژێرەی پارتییە، لە کۆمسیۆن سکاڵای تۆمارکردووە و دەڵێت، بانگەشەی هەڵبژاردن لە کەرکووک سروشتی نییە.

 

هەروەها گوتی، "لە کۆی 40 پۆستەر تاوەکو 30 پۆستەرم هەندێکی دڕێنراوە و هەندێکی بە ئاسنەکەیەوە بردراوە و بەشێکی دیار نییە و بەشێکی دیکەش ئاسەواری نییە، هەموو ئەمانە نیشانەی ئەوەیە کە ئەو لایەنانەی ئەو کارە دەکەن نیشانەی دۆڕاندنیانە و هیچیان پێ نەماوە و تەنیا ئەم کارە ناشرینە دەکەن."

 

لەگەڵ دەستپێکردنی بانگەشەی هەڵبژاردن لە کەرکووک، هەڵمەتێکی فراوانی دڕاندن و سووتاندنی پۆستەری بەربژێران دەستپێکردووە، بەجۆرێک فریای چاککردن و گۆڕینی پۆستەرەکان ناکەون و یەکدی بە دڕاندنی پۆستەرەکان تۆمەتبار دەکەن. 

 

سەمیرە ئەحمەد بەربژێری هاوپەیمانی کەرکووک ئیرادەمانە دەڵێت، "هەندێکی خەڵکی ئاساییە ئەو کارە دەکەن بەڵام کەسانێک هەیە لە ململانێی سیاسی ئەو کارە دەکەن ، هەندێک کەسیش هەیە ترسی لە دەنگەکانی خۆی هەیە و پێی وایە بەم کارە دەتوانێت کاریگەری لەسەر دەنگەکانی بەربژێری بەرامبەر بکات ، هۆکارەکان زۆرن و ناتوانین لە یەک هۆکاردا کۆی بکەینەوە."

 

تائێستا 56 سکاڵا لەسەر دڕاندنی پۆستەرەکان، لە نووسینگەی کەرکووک  لە کۆمسیۆنی هەڵبژاردنەکان تۆمارکراوە و تادێت سەرپێچییەکان زیاتر دەبێت و ململانێکە توندتر دەبێت.

 

عەلی عەباس بەرپرسی راگەیاندنی لقی کەرکووکی کۆمسیۆنی هەڵبژاردنەکان باس لەوەدەکات، "بەداخەوە زۆربەیان سەرپێچی بنەماکانیان کردووە و لە نێو سەرپێچییەکان، دڕاندنی وێنە و پۆستەر هەیە، ژمارەیەک سکاڵامان لە نوێنەرانی حیزبەکانەوە پێگەیشتووە لەسەر دڕاندنی پۆستەرەکانیان و نازانن کێ لە پشت دڕاندنی پۆستەرەکانیانەوەیە."

 

هێزە ئەمنییەکان لە ماوەی یەک هەفتەدا، چوار کەسیان بە تۆمەتی دڕاندن و بردنی پۆستەری بەربژێرەکان دەستگیرکردووە و بەبێ ئاشکرا کردنی لایەنی پاڵپشت رەوانەی دادگە کراون.