یەکێک لەو ئاسایشانەی لە چەمچەماڵ بریندار بوو گیانی لەدەستدا

 

 

ئەمڕۆ شەممە سەرچاوەیەکی ئەمنیی ئاگادار بە تۆڕی میدیایی رووداوی گوت: "کەمێک لەمەوبەر کارمەندی ئاسایش ئاکۆ سابیر حەمەڕەزا، بەهۆی سەختیی برینەکەیەوە لە نەخۆشخانە گیانی لەدەستدا".

 

شایەتحاڵێکیش بە رووداوی گوت: "ئاکۆ سابیر گیانی لەدەستداوە و بریندارەکەی دیکەی ئاسایش تەندروستی جێگیرە".

 

هەر ئەمڕۆ قائیمقامیەتی قەزای چەمچەماڵ لە راگەیێندراوێکدا گیانلەدەستدانی کارمەندەکەی ئاسایشی راگەیاند و سەرەخۆشی لە کەسوکارەکەی کرد.

 

دوێنێ لە چەمچەماڵ لەکاتی دابەشکردنی پێداویستییەکاندا شەڕ و ئاژاوە روویدا و بەهۆیەوە دوو ئاسایش بریندار بوون.

 

عەتا محەممەد، سەرۆکی کۆمیسیۆنی خزمەتگوزاری و بووژاندنەوەی چەمچەماڵ لە کۆنفرانسێکی رۆژنامەڤانیدا رایگەیاند: "کەسێک ویستوویەتی کێشە دروست بکات و سەڕەبڕی بکات و پەلاماری کارمەندێکی ئاسایشی دا و دواتر دوورخرایەوە لە شوێنەکە، بەڵام کەسێکی نزیکی بە چەکەوە هات و لەو قەرەباڵخییەدا تەقەی لە ئاسایشەکان کرد کە بەهۆیەوە سێ کارمەندی ئاسایش برینداربوون کە برینی یەکێکیان سەختە".

 

عەتا محەممەد تۆمەتباری رووداوەکەی بە "پێشمەرگەی عەبدوڵڵا کوێخا موبارەک" ناساند و بە پیلانگێڕی پێناسەی کرد.

 

عەبدوڵڵا کوێخا موبارەک لە راگەیێندراوێکدا رەتی کردەوە "پیلانگێڕی" یان "کێشەی کۆمەڵایەتی" بووبێت و رایگەیاند: "هیوادارم مەبەست لەو قسانە تۆمەت دروستکردن و ناوزڕاندن نەبووبێ، چونکە راستی بابەتەکە ئەوەیە کێشەکە بەهۆی پەیوەستنەبوونی ئەو پێشمەرگانە بووە بەو رێکار و سەرەگرتنەی ئاسایشەکان پەیڕەویان کردووە بۆ دابەشکردنی هاوکارییەکان".

 

عەبدوڵڵای کوێخا گوتی: "ئەو دوو پێشمەرگەیە لەگەڵ دایک و خێزانیان چوون بۆ هاوکاری وەرگرتن و هیچ ناکۆکییەکی کۆنیان لەگەڵ کارمەندەکانی ئاسایش نەبووە."