بەڕێوەبەری کۆمپانیای قەیوان ملیارێک دیناری بەخشییە لێقەوماوانی چەمچەماڵ

 

دلێر کەمال، بەڕێوەبەری راگەیاندنی کۆمپانیای قەیوان، ئەمڕۆ شەممە بە تۆڕی میدیایی رووداوی گوت: "شێخ فاخیر شێخ تەیب، بەڕێوەبەری جێبەجێکاری کۆمپانیاکەمان یەک ملیار دیناری بەخشییە لێقەوماوانی لافاوەکەی چەمچەماڵ و دەوروبەری".

 

بەڕێوەبەری راگەیاندنی کۆمپانیای قەیوان گوتی، پارەکە لە رێگەی ئەو کەمپەینەوە دابەش دەکەن، کە لەلایەن نووسینگەی قوباد تاڵەبانی، جێگری سەرۆکی حکومەتی هەرێمی کوردستانەوە پێکهێندراوە.

 

دلێر کەمال گوتی: "هەر دوای لافاوەکە، کۆمپانیاکەمان بە تیمێک و 30 ئامێری گەورەی جۆراوجۆرەوە گەیشتنە چەمچەماڵ و هاوکارییان کرد بۆ خاوێنکردنەوەی شارەکە".

 

هەر ئەمڕۆ حاجی کاروان، کەسایەتی ناسراوی ئیسلامیی و سەرۆکی رێکخراوی بەختەوەری، ئەمڕۆ شەممە بە تۆڕی میدیایی رووداوی گوت: "لە هەموو نووسینگەکانمان سەرقاڵی کۆکردنەوەی هاوکاری خێرخوازانین بۆ زیانلێکەوتووانی لافاوەکەی چەمچەماڵ و هاوکارییەکی زۆرمان کۆکردووەتەوە".

 

حاجی کاروان گوتی: "ئێستا لە سلێمانی چوار بارهەڵگر شتومەکمان ئامادەیە. هەروەها زیاتر لە 5 هەزار بەتانی و دۆشەک و پێداویستی دیکەمان ئامادەیە و دابەشی دەکەین؛ 600 سەبەتە خۆراکیشمان بەسەر ماڵاندا دابەش کردووە".

 

سەرۆکی رێکخراوی بەختەوەری ئاماژەی بەوە کرد، دوێنێ و رۆژانی پێشتر هەر رۆژە و دوو ژەمەخۆراکی گەرمیان بۆ "سەتان" خێزان لە چەمچەماڵ دابینکردووە. گوتیشی: "نزیکەی 150 زۆپامان ئامادەیە بۆ دابەشکردن و زیاتر لە 100 ملیۆن دیناریشمان کۆکردووەتەوە و دابەشی دەکەین".

 

سەرۆکی رێکخراوی بەختەوەری گوتی: "لە ئەمڕۆوە دابەشکردنی نەوت دەستپێدەکەین و هەر ماڵێک و 50 لیتریان پێدەدەین، ئەوەش وەکو پێویستییەکی بەپەلە لەم کەشە ساردەدا".

 

سێشەممە 09ـی ئەم مانگە، بەهۆی بارانی بەلێزمەوە لە قەزای چەمچەماڵ و ناحیەکانی دەوروبەری لە پارێزگای سلێمانی لافاو دروستبوو، بەهۆیەوە زیانی گیانی و مادی لێکەوتەوە و زیانی زۆریش بەر ژێرخانی ناوچەکە کەوت.