پاسەوانێکی مەلا مستەفا بارزانی: هەمیشە هەوڵی دەدا بەپێی ئایەت و فەرموودە حکومڕانی بکات

 

 

ئەسعەد عادۆ، پێشمەرگەی ئەیلوول دەڵێت، "مەلا مستەفا تا بڵێی هۆشیار و دانا بوو لە ئایین و پەیڕەوێکی باشی ئایین بوو، هەمیشە هەوڵی دەدا بەپێی دەقی ئایەت و فەرموودە حکومڕانی بکات و نەهێڵێت هیچ کەس زوڵمی لێبکرێت یان خودا و پێغەمبەر نەهییان لە شتێک کردبێت، ئەویش نەیدەهێشت پێشمەرگەکانی ئەو کارە بکەن".

 

هەموو ئەو ناوچانەی لەژێر کۆنترۆڵی شۆڕشی ئەیلوول بوون، لیژنەی فەتوای هەبووە و بە پشتبەستن بە یاسا و رێساکانی ئایینی ئیسلام حکومڕانی دەکرا.

 

مستەفا دێرانەیی کە پێشمەرگەی ئەیلوول و پێشمەرگەیەکی گەنجی ئەوکات بووە، دەڵێت، "لەگەڵ دروستبوونی شۆڕش، بارزانی یەکێتیی زانایانی دامەزراند و هەمیشە هەوڵی ئەوە بووە بەپێی یاسا و رێساکانی ئیسلام حکومڕانی بکرێت و هیچ کارێکی یاسایی بەبێ زانایانی ئایینی نەدەکرا، خۆیشی شارەزاییەکی باشی لە ئایین هەبوو".

 

دێرانەیی کاتێک  ساڵی 1962 باوکی شەهید دەبێت، چەکەکەی ئەو هەڵدەگرێت و لە تەمەنی 17 ساڵی دەبێتە پێشمەرگەی شۆڕشی ئەیلوول، ئێستا تەمەنی 75 ساڵە، خوێندەوار بووە و چاک خاسیەتەکانی مەلا مستەفا بارزانی و کردارەکانی بیر ماون.

 

مستەفا دێرانەیی ئاماژە بەوە دەکات، "سێ کۆڵەگەی گرنگ لای ئەو [مەلا مستەفا بارزانی] پەسند بوون: ئایین پەروەری، نیشتمان پەروەری و مرۆڤ دۆستی؛ کە ئەوانە رێک ئایین و ئەو هەمیشە بەو بنەمایانە کاری رۆژانەی خۆی و شۆڕشی دەکرد، تابڵێی لەخواترس بوو، هەمیشە دەیگوت ئایین چی بخوازێت مرۆڤ دەبێت لە هەڵسوکەوتی رۆژانەی ئاوا رەنگبداتەوە".

 

لە 6ی تشرینی یەکەمی ساڵی 1993دا تەرمی مەلا مستەفا بارزانی و ئیدریس بارزانی کوڕی، لە رۆژھەڵاتی کوردستان گەڕێندرانەوە باشووری کوردستان و لە بارزان بەخاکسپێردران.

 

لەوەتەی ئارامگەکەی کەوتووەتەوە زێدی خۆی، ساڵانە لەگەڵ دەستپێکی مانگی ئازاردا کە سەرەتاکەی ساڵڕۆژی کۆچی دواییەتی و ناوەڕاستەکەشی ساڵوەگەڕی لەدایکبوونیەتی، دەیان هەزار کەس لە هەرچوار بەشی کوردستان سەردانی گڵکۆکەی دەکەن.