کەشناسی: سبەی باران دەبارێت

 

لەبارەی کەشوهەوای ئەمڕۆ (پێنجشەممە 14ـی ئادار)، کەشناسیی هەرێمی کوردستان رایگەیاند، ئاسمان نیمچەهەور دەبێت و بەراورد بە دوێنێ پلەی گەرما یەک بۆ دوو پلە بەرز دەبێتەوە.

 

بەگوێرەی کەشناسیی هەرێمی کوردستان، سبەی لە دوای نیوەڕۆوە لە ناوچەکانی باکوور و رۆژهەڵاتی هەرێمی کوردستان نمەباران و  بارانی مامناوەند دەبارێت؛ هەروەها "لە شەودا لە بەشێکی سنووری پارێزگای سلێمانی و ناوچە شاخاوییەکانی، ئەگەری بارانبارین زیاترە و هەندێک کات لە کاتی باراندا هەورە برووسکەش دەبێت".

 

ئاراس جەبار، شارەزای کەشناسی ئەمڕۆ بە تۆڕی میدیایی رووداوی گوت، سبەی لە سنووری پارێزگاکانی سلێمانی و هەڵەبجە و ئیدارەی گەرمیان تاوەباران و نمەبارانی ناوبەناو دەبارێت و لە پارێزگای هەولێر کاریگەریی کەمترە و لاوازە. بە گوتەی ئەو، شەپۆلەکە پارێزگای دهۆک ناگرێتەوە و بەرەبەیانی رۆژی شەممە کۆتایی دێت.

 

هەولێر: 22 پلەی سیلیزی

سلێمانی: 21 پلەی سیلیزی

دهۆک: 21 پلەی سیلیزی

زاخۆ: 22 پلەی سیلیزی

هەڵەبجە: 20 پلەی سیلیزی

کەرکووک: 24 پلەی سیلیزی

سۆران: 20 پلەی سیلیزی

حاجی ئۆمەران: 13 پلەی سیلیزی

گەرمیان: 25 پلەی سیلیزی