بەرپرسێکی ئاماری دهۆک: نەبوونی پڕۆژەی وەبەرهێنان هۆکاری بەرزبوونەوەی هەژارییە

 

 

 

ئەمڕۆ هەینی 14-03-2025، سەباح مەحفووز، بەرپرسی بەشی دۆخی ژیان لە بەڕێوەبەرایەتیی ئاماری دهۆک لەکاتی بەشداریکردنی لە بووڵتەنی کاژێر 13:00ـی تۆڕی میدیایی رووداو کە نالین حەسەن پێشکێشیکرد، لەبارەی بەرزی رێژەی هەژاری لە پارێزگاکە رایگەیاند: ''ئەم بابەتە بۆ نەبوون یان کەمیی پڕۆژەی وەبەرهێنان لە سنوورەکە دەگەڕێتەوە''.

 

بەگوێرەی دوایین رووپێویی کۆمەڵایەتی و ئابووریی وەزارەتی پلاندانانی عێراق، دهۆک هەژارترین پارێزگای هەرێمی کوردستانە کە لە 2007دا 9.3٪ بوو، لە  2012دا بووەتە 5.8٪، لە 2018دا گەیشتوەتە 8.6٪ و لە 2024دا بووەتە 15.3٪. 

 

کەمترین رێژەی هەژاری لە عێراق و هەرێمی کوردستان لە پارێزگای هەولێر تۆمارکراوە کە 7.1٪ـە. سەباح مەحفووز گوتی: ''بەراورد بە دهۆک، ژمارەی پڕۆژەکانی وەبەرهێنان لە هەولێر دوو هێندە زیاترە، ئەوەش دەبێتە هۆی رەخساندنی هەلی کاری زیاتر.''

 

هەر بەگوێرەی دوایین رووپێویی کۆمەڵایەتی و ئابووریی وەزارەتی پلاندانانی عێراق، تێکڕای قەبارەی خێزانی ئاسایی لە دهۆک 06.06، هەولێر 04.67 و سلێمانی 04.25ـە. بەگوتەی بەرپرسی بەشی دۆخی ژیان لە بەڕێوەبەرایەتیی ئاماری دهۆک، هۆکارێکی دیکەی بەرزی رێژەی هەژاری لە پارێزگاکە زیاتربوونی تێکڕای قەبارەی خێزانە بەروارد بە هەولێر و سلێمانی.

 

هاوکات سەباح مەحفووز نائەمنیی ناوچە سنوورییەکانی پارێزگای دهۆک بە هۆکار دەزانێت بۆ چۆڵبوونی گوندەکان کە ''دەستکەوتنی هەلی کاری لە ئاستی شارەکان ئەستەم کردووە و بووەتە هۆی بەرزبوونەوەی زیاتری رێژەی هەژاری لە پارێزگاکە.''

 

پێوەرەکانی ‏هەژاری لە هەرێمی کوردستان و عێراق بەو شێوەیەن کە هەر كەسێک لە مانگێكدا کەمتر لە 137 هەزار دیناری هەبێت بە هەژار هەژمار ‏دەكرێت.

 

پارێزگای دهۆک لە ئاستی هەرێمی کوردستان و عێراق زۆرترین پەنابەر و ئاوارەی لەخۆگرتووە. ئەو بەرپرسە لە بەڕێوەبەرایەتیی ئاماری دهۆک ئاماژەی بەوەش کرد کە ''هاتنی پەنابەران گوشارێکی دیکەیە بۆ سەر پارێزگای دهۆک و بێگومان کاریگەری لەسەر کەمبوونەوەی هەلی کار و بەرزبوونەوەی رێژەی هەژاری هەبووە.''

 

20 بۆ 22ی تشرینی دووەمی 2024 لە عێراق و هەرێمی کوردستان سەرژمێریی گشتی کرا و تێیدا ناوی خێزانەکان تۆمارکرا و تاوەکو 10ی کانوونی دووەمی 2024 فۆڕمی تۆماری خێزان پڕکرایەوە، تێیدا زیاتر لە 70 پرسیار لە هاونیشتمانی و هاووڵاتییان کرا.

 

رۆژی 24ی شوباتی 2025 ئەنجامی گشتیی سەرژمێرییەکە راگەیێندرا.