پاشماوەی مووشەکێکی ئێران لە رواندز کەوتە خوارەوە

 

درەنگی شەوی رابردوو، پاشماوەی مووشەکێکی ئێران کە لە چوارچێوەی هێرشە درۆنی و مووشەکییەکانی ئاراستەی ئیسرائیلی کردبوو، لە گوندی ئاکۆیانی سەر بە قەزای رواندزی ئیدارەی سەربەخۆی سۆران کەوتە خوارەوە؛ بەگوتەی ئەندام جەبار، پەیامنێری تۆڕی میدیایی رووداو لە سۆران، پاشماوەی مووشەکەکە 12 مەتر درێژە و نزیکەی مەترێک بەرینە، کە بە تەواوی ئاسەواری سووتانی پێوە دیارە.

 

پاشماوەی مووشەکەکە کەوتووەتە نێو باخی هاونیشتمانییەکی خەڵکی گوندەکە، بەڵام هیچ زیانێکی گیانی و ماڵی نەبووە.

 

هێزە ئەمنییەکان رێکاری پێویستییان بۆ هەڵگرتنەوە و گواستنەوەی پاشماوەی مووشەکەکە گرتووەتەبەر.

 

یەکێک لە هاونیشتمانییانی خەڵکی گوندی ئاکۆیان بە روودای گوت، ''دەوری کاژێر 01:40ـی بەرەبەیان بوو کە مووشەکەکە لێرە کەوتە خوارەوە، شتێکی زۆر ترسناک بوو و دەرگە و پەنجەرەی گوندی لەراندەوە، تەواو لە بوومەلەرزە دەچوو.'' 

 

شەوی شەممە 13-04-2024 تاوەکو بەرەبەیان، ئێران لە رێگەی نزیکەی 300 درۆن و مووشەکی کرووزەوە هێرشی کردە سەر ئیسرائیل، بەڵام سوپای ئیسرائیل رایگەیاند، هێرشەکە زیانێکی ئەوتۆی نەبووە و 99%ـی مووشەک و درۆنەکانیان خستوونەتە خوارەوە.

 

هێرشەکە دوای ئەوە هات کە رۆژی 01-04-2024 کۆنسوڵخانەی ئێران لە دیمەشق کرایە ئامانج و حەوت کەس، کە دووانیان فەرماندە و ئەوانی دیکەش راوێژکاری سەربازیی ئێران بوون، کوژران، ئێران تۆمەتەکەی خستەپاڵ ئیسرائیل و هەڕەشەی وەڵامدانەوەی کرد.

 

بەشێک لە درۆن و مووشەکەکانی شەوی رابردووی ئێران بە ئاسمانی ناوچەکانی هەرێمی کوردستاندا تێپەڕبوون، کە ژمارەیەکیان لەلایەن سیستمی بەرگریی ئاسمانیی ئەمریکاوە لە سنووری سلێمانی و هەولێر خرانەخوارەوە.