لە گەرمیان ماتەمینیی گشتی بۆ چوار خوێندکارەکە راگەیێندرا

رووداو دیجیتاڵ

سەرپەرشتیاری ئیدارەی گەرمیان رایگەیاند، بەهۆی ئەو رووداوە هاتووچۆی لەسەر رێگەی کەلار - کفری چوار قوتابی تیایدا گیانیان لەدەستدا، بۆ ماوەی سێ رۆژ لە سنووری ئیدارەکەیان ماتەمینیی گشتیی رادەگەیێنن.

ئەمڕۆ 14-05-2024 لەسەر رێگەی کەلار - کفری رووداوێکی هاتووچۆ روویدا و مینی پاسێک کە ژمارەیەک خوێندکاری تێدابوو، وەرگەڕا. جەلال شێخ نووری، سەرپەرشتیاری ئیدارەی گەرمیان رووداوەکە بە "ناخهەژێن" ناودەبات.

لە رووداوەکەدا چوار کچە خوێندکار گیانیان لەدەستدا و حەوت خوێندکاری دیکەش بریندار بوون، ئەو چوار خوێندکارە ناویان "دانیا ئەحمەد لەتیف، کەوسەر ئەحمەد لەتیف، شەم سامان و ئارەزوو سەردار"ە.

 

لەبارەی رووداوەکەوە، موقەدەم سامان عەلی، گوتەبێژی هاتووچۆی گەرمیان، بە رووداوی گوت، مینی پاسەکە لەنزیک گوندی حەسیرە وەرگەڕاوە و قوتابییەکانی نێوی قوتابیی ئامادەیی باکوورن لە کەلار و بۆ گەشتی زانستی چوونەتە کفری.

 

هەروەها د. سیروان محەممەد جەلال، بەڕێوەبەری گشتیی تەندروستیی گەرمیان بە رووداوی گوت، حەوت کەسی دیکە لە رووداوەکەدا برینداربوون و لەژێر چاودێری پزیشکیدان.

 

دوو لەوانەی برینداربوون شۆفێری ئۆتۆمبێلەکە و مامۆستایەک بوون، کە بەهۆی سەختی برینەکەیانەوە رەوانەی نەخۆشخانەی فریاکەوتنی شار لە سلێمانی کران.