قەندیل دوای 20 ساڵ لە بۆردوومانکردنی لە سەروبەندی گۆڕانێکی مێژوویی دایە

 

سنوورەکە قەزاکانی چۆمان، رواندز، پشدەر و پیرانشاری رۆژهەڵاتی کوردستان بەیەکەوە دەبەستێتەوە، 108 گوندە و 45ـی چۆڵ بوونە.

 

بەهۆی شەڕ و ئاڵۆزییەکانی پەکەکە و تورکیا 32 هاونیشتمانیی ناوچەکە گیانیان لەدەستداوە و 58 کەسیش بریندار بوونە.

 

دڵشاد زارگەلی، دانیشتووی یەکێک لە گوندەکانی سنوورەکەیە و دەڵێت، "لە 01-08-2015، پێنج ئەندامی خێزانەکەم لە گوندی زارگەڵی بناری قەندیل بەهۆی شەڕی نێوان پارتی کرێکارانی کوردستان و تورکیا شەهید بوون."

 

سرووشت و ژینگەی ناوچەکە تاوەکو بڵێی دڵڕفێن و بێ وێنەیە، خاوەن هەزاران دۆنم زەویی کشتوکاڵیە، بەڵام نزیکەی 30 ساڵە ژمارەیێکی زۆری خەڵکەکەی لە خێرو بێری بێبەشن.

 

تاهیر فەقێ باس لەوە دەکات، "بوونی پەکەکە لە سنووری ئێمە لایەنی ئەرێنی و نەرێنی هەبووە. ئەرێنییەکەی ئەوەیە ناوچەکەمان جوگرافیایێکی هەستیاری هەیە، ئەگەر ئەوان لێرە نەبوونایە، رەنگە گرووپێکی تووندڕۆ یان تیرۆریست لێرە پەیدابوونایە. زیانەکەیشی ئەوە بووە، چەکدارانی پەکەکە بەردەوام فڕۆکەی تورکیایان لەسەر بوو و گەشتیار نەیدەتوانی بێتە سنوورەکە."

 

ئەم سنوورە بەهێزترین ناوەندی بڕیاری پەکەکەیە، کۆنگرەی 12ـەشی لە دوو شوێنی ناوچەکە بەست.