یەکێتیی ئەورووپا داوای دانبەخۆداگرتن دەکات؛ "هەوڵی دیپلۆماسی یەکلاکەرەوەیە"

 

ڤۆن دێر لاین لە پۆستێکدا لە تۆڕی کۆمەڵایەتیی ئێکس رایگەیاند، لە پەیوەندییەکی تەلەفۆنیدا لەگەڵ ئیسحاق هێرزۆگ، سەرۆکی ئیسرائیل پشتگیریی یەکێتیی ئەورووپای بۆ مافی ئیسرائیل لە بەرگریکردن لە خۆی و پاراستنی هاووڵاتییانی دووپاتکردووەتەوە.

 

لە هەمان کاتدا، سەرۆکی کۆمیسیۆنی ئەورووپا جەختیکردووەتەوە، "پاراستنی سەقامگیریی ناوچەیی زۆر گرنگە."

 

خانمە سەرۆکی کۆمیسیۆن نووسیویەتی: "داوا لە هەموو لایەنەکان دەکەم بەوپەڕی دانبەخۆداگرتنەوە مامەڵە بکەن و کار بۆ هێورکردنەوەی دۆخەکە بکەن."

 

هەروەها دەشڵێت: "هەوڵە دیپلۆماسییەکان بۆ رێگریکردن لە زیادبوونی گرژی یەکلاکەرەوەن."

 

ئەم لێدوانەی سەرۆکی کۆمیسیۆنی ئەورووپا لە کاتێکدایە کە گرژییەکانی رۆژهەڵاتی نێوەڕاست گەیشتوونەتە لووتکە. 

 

دوای ئەوەی ئیسرائیل هێرشێکی بەرفراوانی کردە سەر بنکە ئەتۆمی و سەربازییەکانی ئێران و بووە هۆی کوژرانی دەیان کەس، لەنێویاندا فەرماندەی باڵا، ئێران بە چەندین زنجیرە هێرشی مووشەکی وەڵامی دایەوە.

 

هێرشەکانی ئێران بوونەتە هۆی کوژرانی ژنێک و برینداربوونی دەیان کەسی دیکە لە ئیسرائیل، هەروەها زیانی ماددیی گەورەی لێکەوتووەتەوە. 

 

کۆمەڵگەی نێودەوڵەتی نیگەرانیی قووڵی خۆی دەربڕیوە و داوای دانبەخۆداگرتن دەکات بۆ رێگریکردن لە پەرەسەندنی زیاتری شەڕەکە.