ئاگر لە مارکێتێکی هەولێر کەوتەوە؛ '130 هەزار دۆلار زیانی لێکەوتووەتەوە'

 

ئاگرکەوتنەوەکە کاژێر 04:00ـی بەرەبەیانیی ئەمڕۆ پێنجشەممە 14-08-2025، لە مارکێتێکی نزیک مزگەوتی خدر سوارە لەسەر رێگەی مەخموور- هەولێر روویداوە. فەرهاد دۆڵەمەری، پەیامنێری تۆڕی میدیایی رووداو لە شوێنی رووداوەکەوە رایگەیاند، ''سەرجەم کەلوپەلەکانی نێو دووکانەکە سووتاون و هیچ شتێک بە سەلامەتی دەرنەچووە.''

 

تیمەکانی بەرگریی شارستانی گەیشتوونەتە شوێنی رووداوەکە و ئاگرەکەیان بە تەواوی کۆنترۆڵ کردووە، بەڵام تاوەکو ئێستا هۆکاری ئاگرکەوتنەوەکە نازانرێت.

 

سەعدی تەها، خاوەنی مارکێتەکە بە رووداوی گوت: ''بەرەبەیانیی ئەمڕۆ سێ کرێکاری عەرەب تەلەفۆنیان بۆ کردم و گوتیان ئاگر لە دووکانەکەت کەوتووەتەوە، منیش بە چەند خولەکێک خۆم گەیاندە ئێرە و پەیوەندیمان بە بەرگریی شارستانییەوە کرد.''

 

بەگوتەی سەعدی تەها، سیستمی ئاگرکوژێنەوە لە دووکانەکەدا هەبووە، ''بەڵام بەهۆی تەشەنەسەندنی خێرای ئاگرەکەوە، نەمتوانی بچمە ژوورەوە و بەکاریبهێنم.''

 

رووداوەکە زیانی گیانی نەبووە، بەڵام وەک خاوەنی مارکێتەکە دەڵێت، زیاتر لە 130 هەزار بۆ 140 هەزار دۆلار زیانی مادی بەرکەوتووە و سەرجەم کەلوپەلەکانی نێو دووکانەکە سووتاون.''

 

تاوەکو ئێستا بەرگریی شارستانی هەولێر هیچ زانیارییەکی لەسەر هۆکاری ئاگرکەوتنەوەکەوە نەخستووەتەڕوو و لێکۆڵینەوە لە رووداوەکە بەردەوامە.

 

6ـی تەممووزی 2025، موقەدەم شاخەوان سەعید، گوتەبێژی بەرگریی شارستانیی هەولێر لە کۆنفرانسێکی رۆژنامەڤانیدا رایگەیاند، ئەم ساڵ 650 ئاگرکەوتنەوە روویانداوە کە بەراورد بە ساڵانی رابردوو 50٪ کەمیکردووە.