هەپەگە کوژرانی 12 سەرباز و تورکیاش گیانلەدەستدانی چوار گەریلای بڵاوکردەوە

بەگوێرەی راگەیێندراوەکەی هەپەگە کە رۆژی 14ـی ئەیلوولی 2023 بڵاوکراوەتەوە، گەریلاکانی پەکەکە لە 24 کاژێری رابردوودا لە ناوچەکانی مەتین و زاپ و خواکوڕک لە هەرێمی کوردستان رووبەڕووی هێزەکانی سوپای تورکیا بوونەتەوە.

 

وەک لە راگەیێندراوەکەدا هاتووە، گەریلاکان لە چەند ناوچەیەک لە هەرێمی کوردستان 14 جار هێرشیان کردووەتە سەر هێزەکانی سوپای تورکیا و لە ئەنجامدا 12 سەرباز کوژراون و دوو هێلیکۆپتەریش گورزیان بەرکەوتووە. 

 

رۆژی 11ـی ئەیلوولی 2023، وەزارەتی بەرگریی تورکیا رایگەیاند، لە چەند ئۆپەراسیۆنێکی ئاسمانی و زەمینیدا لە هەرێمی کوردستان رووبەڕووی گەریلاکان بوونەتەوە و بەوهۆیەوە چوار گەریلای پەکەکە گیانیان لەدەستداوە. 

 

ئەم شەڕ و پێکدادانە لە چوارچێوەی ئۆپەراسیۆنێکدایە تورکیا ناوی ناوە چنگ- قوفڵ کە بەرەبەیانی رۆژی 18ـی نیسانی 2022 لە ناوچەکانی ئاڤاشین، مەتین و زاپ لە خاکی هەرێمی کوردستان بۆ سەر پێگەکانی پەکەکە دەستیپێکرد.

 

وەزارەتی بەرگریی تورکیا گیانلەدەستدانی 703 گەریلا و کوژرانی 105 سەربازی سوپای وڵاتەکەی راگەیاندووە؛ هەپەگەش کوژرانی سێ هەزار و 18 سەربازی تورکیا و گیانلەدەستدانی 386 گەریلای راگەیاندووە.