لە پیرانشار کەسێک بە رووداوی هاتووچۆ گیانی لەدەستدا و 4ـی دیکەش بریندار بوون

 

 

ئێوارەی هەینی 13-09-2024، ئۆتۆمبێلێکی تایبەت لە جۆری پراید لەسەر رێگەی پیرانشار - شنۆی سەر بە پارێزگای ورمێی رۆژهەڵاتی کوردستان وەرگەڕا و بەهۆیەوە کەسێک گیانی لەدەستدا.

 

حەمید مەحبووبی، بەڕێوەبەری گشتیی خاچی سووری پارێزگاکە رایگەیاند، ''ئۆتۆمبێلەکە لە کۆنتڕۆڵ دەرچووە و وەرگەڕاوە، تیمەکانی پۆلیسی هاتووچۆ لێکۆڵینەوە لە هۆکاری وەرگەڕانی دەکەن.''

 

بە گوتەی مەحبووبی، جگە لەو کەسەی گیانی لەدەستداوە چوار سەرنشینی دیکەی ئۆتۆمبێلەکە بریندار بوون و گواستراونەتەوە بۆ نەخۆشخانە.

 

ساڵانە لە ئێران و رۆژهەڵاتی کوردستان بەهۆی "خراپیی رێگەوبانەکان"، "پابەندنەبوونی شۆفێران" بە رێنماییەکانی هاتووچۆ و خێرایی زۆر، هەزاران کەس بە رووداوی هاتووچۆ گیانلەدەستدەدەن و هەزارانی دیکە بریندار دەبن.