کەشناسی: پێشبینی دەکرێت پرووشەباران ببارێت

 

 

لەبارەی کەشوهەوای سبەی یەکشەممەوە، ئەمڕۆ شەممە 14ی ئۆکتۆبەری 2023 کەشناسیی هەرێمی کوردستان بڵاویکردەوە، "ئاسمان نیمچە هەور دەبێت و هەندێکجار دەگۆڕێت بۆ هەوری تەواو. ئەگەری بارینی پرووشەباران هەیە، بەتایبەتی لە ناوچە شاخاوییە سنوورییەکان."

 

ئاراس جەبار، شارەزای کەشناسی ئەمڕۆ شەممە بە تۆڕی میدیایی رووداوی گوت، تاوەکو ئەمڕۆ بارانی بەلێزمەی ئەمساڵ روون نییە کەی دەبارێت. گوتیشی، "شەپۆلێک هەیە بۆ کۆتایی ئەم مانگە، بەڵام ئەویش جێگیر نەبووە و گۆڕانکاریی خێرا روودەدەن."

 

ئەو کەشناسە دەڵێت، رۆژی دووشەممە پلەی گەرما بە رێژەیەکی بەرچاو و نزیکەی شەش پلە دادەبەزێت. گوتیشی، رۆژی دووشەممە شەپۆلێکی خۆڵبارین تەواوی باشووری کوردستان دەگرێتەوە و کاریگەریی زیاتری لەسەر پارێزگای کەرکووک و دەڤەری گەرمیان دەبێت، لە شارەکانی دیکەش لاواز بۆ مامناوەند دەبێت.

 

 

هەولێر: 33 پلەی سیلیزی

سلێمانی: 32 پلەی سیلیزی

دهۆک: 32 پلەی سیلیزی

کەرکووک: 36 پلەی سیلیزی

هەڵەبجە: 34 پلەی سیلیزی

زاخۆ: 33 پلەی سیلیزی

سۆران: 31 پلەی سیلیزی

حاجی ئۆمەران: 21 پلەی سیلیزی

گەرمیان: 38 پلەی سیلیزی