کۆنکرێت، زبڵ و خاشاک بوونە هۆی پەنگخواردنی ئاو لەژێر پردی سەیداوەی هەولێر

رووداو دیجیتاڵ
رووداو دیجیتاڵ 

رووداو لە شوێنی پەنگخواردنی ئاو لەژێر پردی سەیداوەی هەولێر بەدواداچوونی بۆ هۆکاری پەنگخواردنی ئاو کرد و دەرکەوت کە بەشێکی بەهۆی دانانی کۆنکرێت و کۆبوونەوی زبڵ و خاشاک بووە لەژێر پردەکە. 
 
فەرهاد دۆڵەمەری، پەیامنێری رووداو لە سەیداوەی هەولێر دیمەنەکانی گواستنەوە و دەردەکەوێت، دەرچەی ئاو لەژێر پردەکە لە هەردوو لاوە بە کۆنکرێت داخراوە و زبڵ و خاشاکێکی زۆر لەژێر پردەکە کۆبووەتەوە، ئەوەش بووەتە هۆی قەتیسبوونی ئاوی باران. 
 
بڕیاردراوە ئەو کۆنکرێتە هەڵبگیرێت و تیمەکانی بەرگریی شارستانی دەستیانکردووە بە کردنەوەوەی رێڕەوەکە. 
 
لەو بارەیەوە، ئومێد خۆشناو، پارێزگاری هەولێر لە شوێنی پەنگخواردنی ئاو گوتی، لیژنەیەک پێکهێندراوە لەسەر پڕۆژەی جێبەجێکاری بازاڕی نیشتمان لەبارەی ئەو کەموکوڕیانەی بوونەتە هۆی پەنگخواردنی ئاو.
 
 
پێشتر، ئێوارەی رۆژی پێنجشەممە، کاروان میراودەلی، گوتەبێژی بەرگریی شارستانیی هەولێر لە سەیداوە بە پەیامنێری رووداوی راگەیاند، "تاوەکو ئێستا زیاتر لە 16 ئۆتۆمبێلمان لە شۆڕش و 11 ئۆتۆمببێلیش لە سەیداوە لەژێر ئاو دەرکردووە؛ نزیکەی 35 بۆ 40 ئۆتۆمبێل لەسەر شەقامەکان گیریان خواردووە."

 

 
لە شەوی رابردووەوە شەپۆلێکی بەهێزی بارانبارین پارێزگاکانی هەرێمی کوردستانی گرتووەتەوە، پێشتریش کەشناسیی هەرێمی کوردستان هۆشداری لەبارەی دروستبوونی لافاو و بارانبارینی بەخوڕ دابوو، بەهۆی ئەو شەپۆلە بارانبارینەوە شەوی رابردوو ئیدارەی سەربەخۆی گەرمیان و قەزای دەربەندیخان لە دامودەزگە حکومییەکان و بەشێکیان لە ناوەندە پەروەردەییەکان پشوویان راگەیاند، بەڵام پارێزگای هەولێر لە راگەیێندراوێکدا رایگەیاند، لە سنووری پارێزگاکەیان دەوام ئاساییە و پشوو نییە.