HKN: بەهۆی هێرشێکەوە بەرهەمهێنانی نەوت لە کێڵگەی سەرسنگ وەستاوە

 

 

کۆمپانیاکە رایگەیاندووە کە هەموو ستافی کێڵگەکە سەلامەتن و تیمی فریاگوزاری سەرقاڵی کوژاندنەوەی ئاگری تەقینەوەکەن و هێشتا کۆنترۆڵ نەکراوە.

 

HKN دەڵێت رووداوەکە کاژێر 7:00 ـی بەیانی بە کاتی هەولێر روویداوە و لێکۆڵینەوە لەسەر هۆکاری تەقینەوەکە دەکرێت.

 

HKN هەروەها رایگەیاندووە کە لەگەڵ بەرپرسانی ناوچەکە کاردەکەن بۆ کۆنترۆڵکردنی دۆخەکە و تاوەکو دڵنیا نەبنەوە بەرهەمهێنانی نەوت دەستپێناکەنەوە.

 

ئەو کێڵگەیەی هێرشی کراوەتە سەر دەکەوێتە سنووری ناحیەی چەمانکێ لە قەزای ئامێدی. 

 

سەرچاوەیەکی بەرپرس لە ناحیەکە، پشتڕاستیکردەوە کە هێرش کراوەتە سەر کێڵگەکە و بە رووداوی راگەیاند، بەرەبەیانى ئەمڕۆ لە گوندى ملبرکێ سنوورى ناحیەى چەمانکێ سەر بە قەزایى ئامێدى هێرشێکى ئاسمانى کرایە سەر کێڵگەیەکى نەوت.

 

سەرچاوەکە گوتی: "بەهۆى ئەو هێرشە ئاگر لە کەمپى کێڵگەکە و چەند شوێنێکى دیکە کەوتووەتەوە، تیمى بەرگرى شارستى گەیشتوونەتە شوێنى رووداوەکە بۆ کۆنتڕۆڵکردنی ئاگرەکە."

 

بە گوتەی ئەو سەرچاوەیە، هێرشەکە هیچ زیانی گیانی لێنەکەوتووەتەوە و تەنیا زیانی مادی هەبووە.

 

سەرچاوەکە ئاماژەی بەوەدا تاوەکو ئێستا روون نییە، هێرشەکە لە رێگەی رۆکێتەوە بووە، یان درۆن.