هێزە ئەمنییەکانی ئامێدی: نازانین هێرشەکەی سەرسنگ درۆن بووە یان تەقینەوە

 

 

تەقینەوەکە نزیک کاژێر 07:00ـی بەیانی ئەمڕۆ سێشەممە روویداوە. ئەفسەرێکی باڵای ئەمنی لە ئامێدی، بە تۆڕی میدیایی رووداوی گوت: "هێرشەکە زیانی مادی هەبووە، بەڵام هیچ زیانێکی گیانی نەبووە".

 

بەگوتەی ئەو سەرچاوەیە، تاوەکو ئێستا نازانن هێرشەکە درۆن بووە، یان بەهۆکارێکی دیکە، ئەوەی هەیە تەقینەوەیەک بووە و لێکۆڵینەوەی زیاتر دەکەن.

 

دوای تەقینەوەکە کۆمپانیای HKN ـی ئەمریکی کە لە کێڵگەکەدا کار دەکەن رایگەیاند، بەهۆی تەقینەوە لە کێڵگەی سەرسنگ بەرهەمهێنانی نەوتیان راگرتووە.

 

کۆمپانیاکە دەڵێت: "ستافی کێڵگەکە سەلامەتن و تیمی فریاگوزاری سەرقاڵی کوژاندنەوەی ئاگری تەقینەوەکەن".

 

لە رووداوێکی هاوشێوەدا، شەوی رابردوو لە رێگەی دوو فڕۆکەی بێ فڕۆکەوانەوە هێرشکرایە سەر کێڵگەی نەوتی خوورمەڵە لە پارێزگای هەولێر.

 

دوای هێرشەکە سەرچاوەیەکی باڵا و ئاگادار بە تۆڕی میدیایی رووداوی گوت، لە هێرشەکەدا هیچ زیانی گیانی نەبووە.

 

دوای بڵاوبوونەوەی هەواڵەکە، هەر شەوی رابردوو لە راگەیێندراوێکدا پەیجی دژە تیرۆری کوردستان رایگەیاند: "ئێوارەی ئەمڕۆ کاژێر 20:20 و 20:25، دوو درۆنی بۆمبڕێژکراو لە کێڵگەی نەوتی خوورمەڵە لە پارێزگای هەولێر کەوتنە خوارەوە، خۆشبەختانە هیچ زیانێکی گیانییان لێ نەکەوتەوە".