تێزابی مەرگ لە تانجەرۆی سلێمانی؛ "هاوژینەکەم بە شێرپەنجە مرد و تۆمەتباران لە ئێمە بەهێزترن"

 

 

عەلائەدین ئیبراهیم، دانیشتووی گوندی چەقڵاوە دەڵێت، "بە ترێلە تێزاب دەکەنە ناو ئەو چەمەوە، هاوژینەکەی خۆم تووشی شێرپەنجە بوو و مرد."

 

هیدایەت محەممەد، دانیشتووی گوندی ناوگردان ئاماژەی بەوە کرد، "ئێستا قوڕگم دەدۆخێتەوە و دۆخمان زۆر خراپە."

 

ماوەیەکە کەم شوێنی گوندی چەقڵاوەی سلێمانی هەیە، پاشماوەی فڕێدراوی تێزاب جۆگەی نەبەستبێت و بەسەر زەوییەکەیدا بڵاونەبووبێتەوە. شەوانە و بە نهێنی تانکەر دەچن لەسەر زەویی کشتوکاڵی، نزیک سەرچاوەی ئاوی خواردنەوە و ئاوی تانجەرۆ ئەو پاشماوە زیانبەخشانە فڕێدەدەن.

 

شێخ محەممەد فەقیرە، دانیشتووی گوندی چەقڵاوە باسی لەوە کرد، "ئەو تێزابە دەچێتە نێو سەرچاوە ئاوییەکانمان و هەمووی دەرد و نەخۆشییە."

 

محەممەد عەبدوڵڵا، موختاری گوندی چەقڵاوە و ناوگردان گوتی، "چووینەتە هەر شوێنێک بۆ چارەسەر، گوتوویانە بەسەرچاو، بەڵام ئەنجامی نەبووە، چونکە تۆمەتباران پشتیان لە ئێمە بەهێزترە."

 

بەپێی گوتەی پسپۆڕانی ژینگە، پاشماوەی تێزاب زیانی گەورەی ژینگەیی و تەندروستیی هەیە، بە شێوەیەک کە هۆکارە بۆ تووشبوون بە شێرپەنجە و کاریگەرییە نەرێنییەکانی بۆ ماوەیەکی درێژ لەسەر ژینگە دەمێنێتەوە.

 

عەبدولموتەلیب رەفعەت، مامۆستای زانکۆی گەرمیان و شارەزای ژینگە دەڵێت، "ئەو تێزابە زۆر خراپە، هۆکارە بۆ تووشبوون بە نەخۆشیی شێرپەنجەی پێست و کۆئەندامی هەناسە و هەرس."

 

ناوگردان، چەقڵاوە و بەردەکەڕ ئەو گوندانەی کە پاشماوەی کارگەکان و تێزاب زیانی پێگەیاندوون، دەکەونە سەر شەقامی 100 مەتری و خەڵکەکەی سکاڵایان تۆمار کردووە، بەڵام تاوەکو ئێستا کەس لەسەر فڕێدانی پاشماوەی تێزاب دەستگیر نەکراوە.