هەرێمی کوردستان دەچێتە وەرزی پاییزەوە و پێشبینی بارانبارین دەکرێ

 

 

کەشناسیی هەرێمی کوردستان بڵاویکردەوە، ئەمڕۆ دووشەممە پلەی گەرمای باشووری کوردستان هاوشێوەی دوێنێ دەبێ و سبەی "نزیک" دەبێتەوە لە تۆمارکراوەکانی ئەمڕۆ. 

 

عامر جابری، گوتەبێژی دەستەی کەشناسیی عێراق، ئەمڕۆ دووشەممە بە تۆڕی میدیایی رووداوی راگەیاند: "کاریگەریی بارستە هەوایەکی سارد لە کۆتایی ئەم هەفتەیەدا دەگاتە عێراق و لە باکوور و رۆژئاوای وڵات دابەزینێکی بەرچاو لە پلەی گەرما تۆمار دەکرێ."

 

گوتەبێژی دەستەی کەشناسیی عێراق گوتی: "پلەی گەرما لە پارێزگاکانی هەرێمی کوردستان 2 بۆ 4 پلە یان زیاتر دادەبەزێ، بە جۆرێک لە رۆژدا کەشەکە مامناوەند و لە شەودا فێنک دەبێت، لەکاتەکانی بەرەبەیانیشدا سارد دەبێت."

 

عامر جابری گوتی: "پارێزگاکانی باشوور تاوەکو کۆتایی هەفتە لەژێر کاریگەریی بارستەهەوای گەرمدا دەمێننەوە، بەڵام پێشبینی دەکرێ لە سەرەتای هەفتەی داهاتووەوە پلەی گەرما لەو پارێزگایانەش دەست بە دابەزین بکات و بەشێوەیەکی گشتی پلەی گەرما لە عێراق بۆ خوار 40 پلەی سیلیزی دابەزێ".

 

شاڵاو هیدایەت، شارەزای کەشوهەوا، ئەمڕۆ بە تۆڕی میدیایی رووداوی گوت: "دووشەممەی داهاتوو 22ـی ئەیلوول، هەرێمی کوردستان وەرزی هاوین بەڕێدەکات و 23ـی ئەیلوول یەکەم رۆژی وەرزی پاییز دەبێت".

 

شاڵاو هیدایەت پێشبینی دەکات "لەنێوان 17 بۆ 19ـی ئەم مانگە، تاوەباران و برووسکە چەند ناوچەیەکی هەرێمی کوردستان بگرێتەوە و کاریگەری زیاتری لەسەر ناوچەکانی باکوور، باکووری رۆژهەڵاتی هەرێمی کوردستان هەبێ".

 

بەگوێرەی کەشناسیی هەرێمی کوردستان، سبەی پلەی گەرما لە باشووری کوردستان بەم شێوەیە دەبێت:

 

هەولێر؛ 37°

سلێمانی؛ 35°

دهۆک؛ 35°

هەڵەبجە؛ 38°

کەرکووک؛ 38°

گەرمیان؛ 41°

زاخۆ؛ 36°

سۆران؛ 35°

ئامێدی؛ 33°

ئاکرێ؛ 37°

حاجی ئۆمەران؛ 24°