کۆمیسیۆن بۆ رووداو: هیچ بڕیارێک بۆ درێژکردنەوەى ماوەى وەرگرتنەوەى کارتى دەنگدان نییە

 

سێشەممە، 15-10-2024، عیماد جەمیل، سەرۆکى تیمى رۆژنامەڤانیى کۆمیسیۆنى باڵاى سەربەخۆى هەڵبژاردنەکانى عێراق بە تۆڕى میدیایی رووداوى راگەیاند، "هێشتا هیچ بڕیارێکى ئەنجوومەنى کۆمیسیاران نییە بۆ درێژکردنەوەى ماوەى وەرگرتنەوە کارتى بایۆمەتریی دەنگدان و چاوەڕێى تەواوبوونی دەوامى فەرمى دەکەین." 

 

بەگوێرەى رێکارەکانى کۆمیسیۆن، کاژێر 03:00ـى پاشنیوەڕۆى ئەمڕۆ دوا کاتە بۆ وەرگرتنەوە کارتى بایۆمەتریی دەنگدان بۆ هەڵبژاردنى پەرلەمانى کوردستان.   

 

دوو ملیۆن و 899 هەزار و 615 هاونیشتمانیی هەرێمى کوردستان کارتى بایۆمەتریی دەنگدانیان وەرگرتووەتەوە و دەتوانن دەنگ بدەن، بەڵام تائێستا 110 هەزار و 385 دەنگدەر کارتەکانیان وەرنەگرتووەتەوە.

 

عیماد جەمیل رایگەیاند، پێناچێت وادەى وەرگرتنەوەى کارتى بایۆمەتریی دەنگدان درێژبکرێتەوە؛ بەوپێیەى لە 16ـی تشرینى یەکەمەوە کۆمیسیۆن دەستدەکات بە دابەشکردنى کەرەستە و پێداویستییەکانى دەنگدان و، کارمەندانى کۆمیسیۆن لە ناوەندەکانى دەنگدان سەرقاڵ دەبن و دەرفەتى زۆریان لەبەردەست نابێت بۆ دابەشکردنى ئەو کارتانە. 

 

دەنگدانى تایبەت بۆ هەڵبژاردنى پەرلەمانى کوردستان لە 18ـی ئەم مانگەیە و دوو رۆژ دواتریش دەنگدانى گشتىیە، کە یەکەم جارە ئەو دەنگدانە بە سیستمى ئەلیکترۆنى دەبێت.

 

تاوەکو ئێستا لە هەولێر 25 هەزار و 846 کارتى دەنگدان وەرنەگیراونەتەوە، لە دهۆک 12 هەزار و 139 کارت و لە سلێمانی و هەڵەبجەش 72 هەزار و 400 کارت وەرنەگیراونەتەوە.