دوای 11 ساڵ و 38 تاقیکردنەوە، گەنجێک مۆڵەتی شۆفێری بەدەستدەهێنێت

 

بڕوا دڵشاد، کە لە ساڵی 2014ـەوە هەوڵی بۆ دەرهێنانی مۆڵەت داوە، ئەمڕۆ شەممە 15-11-2025، لە کاتی بەشداریکردن لە بەرنامەی (رۆژی هیوا جەمال) لە تۆڕی میدیایی رووداو، ئاشکرای کرد، کێشەی سەرەکیی ئەو نەبوونی شارەزایی نەبووە لە شۆفێریدا، بەڵکو تووشبوون بووە "سترێس و قەلەقییەکی زۆر" لە کاتی تاقیکردنەوەکاندا. ئەو دەڵێت: "کاتێک دەچوومە ناو بەڕێوەبەرایەتیی هاتووچۆ، قاچ و دەستم دەلەرزین."

 

ئەو گەنجە روونیکردەوە کە هەمیشە لە تاقیکردنەوەی تیۆری و "ژمارە هەشت" بە ئاسانی دەرچووە، بەڵام لە تاقیکردنەوەی کرداری و بەتایبەت لەسەر رەمپەی هاتووچۆ تووشی کێشە دەبوو و شکستی دەهێنا.

 

سەرەڕای ئەمەش، بڕوا جەخت دەکاتەوە کە لە دەرەوەی تاقیکردنەوەکان شۆفێرێکی زۆر باشە و هیچ کێشەیەکی نییە. چیرۆکە دوور و درێژەکەی وایکردووە کە زۆربەی کارمەندانی هاتووچۆ بیناسن و تەنانەت هەوڵیانداوە هانی بدەن بۆ ئەوەی بەسەر ترسەکەیدا زاڵ بێت.

 

بڕوا دەڵێت، کاتێک دواجار لە تاقیکردنەوەی 38ـەمدا دەرچوو، "بەڕاستی شۆک بووم". ئەو بە پەرۆشەوە باسی لەوە کرد کە پلانی هەیە ئاهەنگێکی گەورە ساز بکات، چونکە ئەمە بە "سەرکەوتنێکی گەورە لە ژیانی خۆی" دەزانێت و وەک قۆناخێکی گرنگ سەیری دەکات.