سەرۆک بارزانی: هیچ کەس و لایەنێک لەژێر هەر بیانوویەک بۆی نییە رێگری لە هەڵکردنی ئاڵای کوردستان بکات
رووداو دیجیتاڵ
سەرۆک مەسعود بارزانی پێشوازی لەو گەنجانەی دووزخورماتوو کرد لە رۆژی هەڵبژاردن لەسەر هەڵکردنی ئاڵای کوردستان لەلایەن هێزە ئەمنییەکانی عێراق سزادرابوون.
رۆژی 11-11-2025 لە کاتی بەڕێوەچوونی دەنگدانی گشتی بۆ پەرلەمانی عێراق، چەند گەنجێکی کورد لەسەر بەرزکردنەوەی ئاڵای کوردستان لەلایەن هێزە ئەمنییەکانی عێراق هێرشیان کرایە سەر.
سەرۆک بارزانی ئەمڕۆ شەممە، 15-11-2025 پێشوازی لەو گەنجانە کرد. بارەگای بارزانی لەبارە دیدارەکە دەڵێت، سەرۆک بارزانی وێڕای "سوپاس و دەستخۆشی بۆ بوێری و كوردپەروەرییان"، جەختی لەوە كردەوە، "لەپێناو ئاڵای كوردستاندا خوێن و قوربانییەكی زۆر دراوە، ئاڵای كوردستان ئاڵای هەموو كوردێكە و هەر كوردێک مافی دەستووری و یاسایی خۆیەتی شانازی بە ئاڵا و پیرۆزییەكانی گەلەكەی بكات".
سەرۆک بارزانی: هیچ کەس و لایەنێک لەژێر هەر بیانوویەک بۆی نییە رێگری لە هەڵکردنی ئاڵای کوردستان بکات https://t.co/SsT3PNc7O4 pic.twitter.com/pHPeAKfQP6
— Rudaw (@Rudawkurdish) November 15, 2025
سەرۆک بارزانی لە دیدارەکەدا ئاماژەی بەوە دا، "هیچ كەس و لایەنێک بۆی نیە لەژێر هیچ بیانوویەك سووكایەتی بە ئاڵای كوردستان بكات یان رێگری لە هەڵكردنی بكات".