محەممەد ئیحسان: هێرشەکانی ئێران بۆ سەر هەولێر بەردەوام دەبن

 

 

د. محەممەد ئیحسان، مامۆستای کۆلێژی جەنگ لە زانکۆی لەندەن، لەبارەی هێرشەکانی سوپای پاسدارانی کۆماری ئیسلامی ئێران بۆ سەر هەولێر بە تۆڕی میدیایی رووداوی راگەیاند: "ئەمە جاری دووەمە کۆماری ئیسلامی ئێران بە فەرمی هەولێر دەکاتە ئامانج، پێموایە ئەو هێرشانە بەردەوام دەبن". 

 

شەوی دووشەممە، 15-01-2024 بە چەندین مووشەک هێرشکرایە سەر چەند ناوچەیەکی شاری هەولێر، لەوانە ماڵی سەرمایەداری کورد پێشڕەو دزەیی، کە لە هێرشەکەدا گیانی لەدەستدا و زۆربەی ئەندامانی خێزانەکەشی بریندار بوون.

 

هەر زوو سوپای پاسدارانی ئێران بەرپرسیارێتیی هێرشەکەی لە ئەستۆ گرت. مامۆستاکەی کۆلێژی جەنگ لە زانکۆی لەندەن رایگەیاند، "نابێت هەموو رۆژێک کەس و سەرمایەدارێک بکرێتە ئامانج و شەهید بکرێت، پێشڕەوی دزەیی کەسێکی دوور لە سیاسەت بووە، ئەگەر ئێران لە بنکەکانی مۆساد دەگەڕێت با لە تاران، مەشهەد و ناوچەکانی دیکە بگەڕێت".

 

د. محەممەد ئیحسان، جەخت لەوەدەکاتەوە هەرێمی کوردستان نایەوێت ببێتە گۆڕەپانی ململانێی نێوان ئەمریکا و ئێران، بەڵام پێیوایە: "ئەمجارە ویلایەتە یەکگرتووەکانی ئەمریکا هەڵوێستی تووند و جدی دەبێت."

 

شەوی سێشەممە ئەنجوومەنی ئاسایشی هەرێمی کوردستان لە راگەیێندراوێکدا رایگەیاند: "کاتژمێر 11:30ی شەوی 15 لەسەر 16ی کانوونی دووەمی 2024، سوپای پاسدارانی ئێران بە چەندین مووشەکی بالیستیکی چەند ناوچەیەکی سڤیلنشینی هەولێری بۆردوومان کرد."

 

سەبارەت بە زیانەکانی هێرشەکەش، ئەنجوومەنی ئاسایشی هەرێمی کوردستان راگەیاندووە: "بەداخەوە بەپێی ئامارە سەرەتاییەکان چوار هاووڵاتیی سڤیل شەهید و 6 کەسی دیکەش بریندار بوون، کە ڕەوشی تەندروستیی هەندێ لە بریندارەکان ناجێگیرە."