هاوسەرۆکی دەم پارتی لەبارەی بڕیارەکانی کۆنگرەی پەکەکە: هەنگاوی گرنگن

 

 

تولای هاتیمئۆغوڵڵاری، هاوسەرۆکی (دەم پارتی) رۆژی هەینی 16ی ئایاری 2025 لە کۆنگرەی هاوپەیمانیی دیموکراسیی ژنانی ناوچەی رۆژهەڵاتی نێوەڕاست و باکووری ئەفریقیا (نادا) کە لە شاری سلێمانی لە هەرێمی کوردستان بەڕێوەدەچێت، گوتارێکی پێشکێشکرد.

 

هاتیمئۆغوڵڵاری جەختی لە گرنگیی رۆڵی ژنان لە پرۆسەی چارەسەری کردەوە و گوتی، "هەر گفتوگۆ و دانوستاندنێک بۆ راگرتنی شەڕ کرابێت و ژنان تێیاندا بەشدار نەبووبن، شکستی هێناوە."

 

هاوسەرۆکی دەم پارتی بڕیارەکانی پەکەکەی لەبارەی خۆهەڵوەشاندنەوە و کۆتاییهێنان بە خەباتی چەکداری بە ''هەنگاوێکی گرنگ'' بۆ پرۆسەی چارەسەری ناوبرد، باسی لەوەش کرد، "ئەم پێشهاتانە نەوەک تەنیا تورکیا، بەڵکو کاریگەرییان لەسەر عێراق، ئێران و سووریاش دەبێت."

 

رۆژی دووشەممە 12ی ئایاری 2025 پەکەکە، ئەنجامی کۆنگرەی 12ی خۆی راگەیاند کە لە 5 - 7ی ئایار بەڕێوەچوو. پەکەکە بڕیاری خۆهەڵوەشاندنەوە و کۆتاییهێنان بە خەباتی چەکداری دا.

 

هاوسەرۆکی ئەو پارتەکە گوتیشی، "بڕیارەکانی کۆنگرەی پەکەکە، رۆڵیان لە چارەسەرکردنی پرسی کورد بەشێوەیەکی دیموکراسی و ئاشتییانە دەبێت، کە یەکێکە لە برینە ساڕێژنەکراوەکانی رۆژهەڵاتی نێوەڕاست."