کۆمیسیۆن: لە هەڵبژاردنی گشتیدا هیچ کەسێک لە هەرێمی کوردستان دەنگ نادات

هەرچەندە دەنگدانی تایبەت بۆ ئەنجوومەنی پارێزگاکانی عێراق ئەمڕۆ دەستیپێکردووە و هەرێمی کوردستان ناگرێتەوە، بەڵام لە سێ پارێزگای هەرێمی کوردستانیش زیاتر لە 48 هەزار کەس مافی دەنگدانیان هەیە. لەو ژمارەیە جگە لە ئاوارەکان، پێشمەرگە، پۆلیس، پاسەوانی سنوور، زێرەڤانی و پۆلیسی هاتووچۆ هەن.

 

خالید عەباس، سەرۆکی لقی دهۆکی کۆمیسیۆنی باڵای سەربەخۆی هەڵبژاردنەکانی عێراق ئەمڕۆ شەممە بە تۆڕی میدیایی رووداوی گوت، "ئەوانەی لە دەنگدانی تایبەتدا دەنگ دەدەن و جگە لە ئاوارەکان هێزە ئەمنییەکانن کە زۆرینەیان پاسەوانی سنوورن؛ هەروەها بەشێکیان پێشمەرگە و هێزە ئەمنییەکانی دیکەن، بەڵام هەموویان خەڵکی دەرەوەی هەرێمی کوردستانن و خەڵکی ناوچە دابڕاوەکانن."

 

سەرۆکی لقی دهۆکی کۆمیسیۆنی باڵای سەربەخۆی هەڵبژاردنەکان دەڵێت، لە سنووری پارێزگای دهۆک کە ئەمڕۆ 39 هەزار و 422 دەنگدەر مافی دەنگدانیان هەیە، نزیکەی 14 هەزار دەنگدەریان ئاوارە نین و زۆرینەیان لە هێزە ئەمنییەکانن.

 

بڕیارە دووشەممە 18ـی ئەم مانگە، هەڵبژاردنی گشتی لە 15 پارێزگای عێراق و باشووری کوردستان بۆ هەڵبژاردنی ئەنجوومەنی پارێزگاکان بەڕێوەبچێت. خالید عەباس گوتی، "لە رۆژی دەنگدانی گشتیدا هیچ دەنگدەرێک لە هەرێمی کوردستان مافی دەنگدانی نابێت، ئەوەی هەیە تەنیا ئەمڕۆیە و بۆ دەنگدانی تایبەتە."

 

بۆ هەڵبژاردنی گشتیی ئەنجوومەنی پارێزگاکانی عێراق کە 18ـی ئەم مانگە بەڕێوەدەچێت، 16 ملیۆن و 158 هەزار و 788 کەس مافی دەنگدانیان هەیە، لەو ژمارەیە ئەمڕۆ و لە دەنگدانی تایبەتەدا ملیۆنێک و دوو هەزار و 393 دەنگدەر مافی دەنگدانیان هەیە و لەو ژمارەیەش 48 هەزار و 260 کەس ئاوارەن و مافی دەنگدانیان هەیە کە لە هەرێمی کوردستاندا دەژین.