پۆلیسی سلێمانی: هیچ گوشارێک لەسەر دەنگدەران نییە

 

 

ئەمڕۆ شەممە 16-12-2023، کاژێر 07:00ـی بەیانی، دەنگدانی تایبەت بۆ هەڵبژاردنی ئەنجوومەنی پارێزگاکانی عێراق دەستیپێکرد. لە دەنگدانەکەدا 48 هەزار و 260 ئاوارە لە هەرێمی کوردستان مافی دەنگدانیان هەیە کە سێ هەزار و 815 دەنگدەر لە پارێزگای سلێمانین.

 

ئاسۆ شێخ تەها، بەڕێوەبەری پۆلیسی سلێمانی بە ئەرکان عەلی، پەیامنێری تۆڕی میدیایی رووداوی گوت، ''ئەوەی بە ئێمە سپێردراوە لە ئەرکی چاودێری و پاراستنی بنکەکانی دەنگدان بە شێوەیەکی باش بەڕێوەدەچێت و تا ئێستا لە هیچ بنکەیەکی دەنگدان کێشە تۆمارنەکراوە".

 

ئاسۆ شێخ تەها باسی لەوە کرد، لە بنکەکانی دەنگدان سندووقی تۆمارکردنی سکاڵا دانراوە و دەنگدەران دەتوانن لە ئەگەری هەبوونی هەر سکاڵایەک، لەو رێگەیەوە دەنگی خۆیان بە لایەنی پەیوەندیدار بگەیێنن.

 

بەپێی رێنماییەکانی کۆمیسیۆن، لە کاتی بەڕێوەچوونی دەنگدان هیچ یەک لە لایەن و بەربژێرەکان مافی بانگەشەی هەڵبژاردنی نییە. بەڕێوەبەری پۆلیسی سلێمانی لەوبارەوە گوتی، ''لە هەر شوێنێکی نزیک لە بنکەکانی دەنگدان بانگەشە بۆ هەڵبژاردن بکرێت، رێکاری یاسایی بەرامبەر ئەو کەسە دەگیرێتەبەر و هێزەکانمان رێگەی بانگەشە بە هیچ لایەن و بەربژێرێک نادەن".

 

بەگوتەی ئاسۆ شێخ تەها، "هێزە ئەمنییەکان وەک بەشێک لە دەنگدەرانی تایبەت بەراورد بە رابردوو زۆر باشتر رێکخراون و تا ئێستا بێ هیچ کێشەیەک دەنگی خۆیان داوە. گوتیشی، هیچ گوشارێک لەسەر دەنگدەران نییە و سەردانی سەرجەم بنکەکانمان کردووە و دەنگدان بە شێوەی ئاسایی بەڕێوەدەچێت".

 

ئەمڕۆ شەممە، ملیۆنێک و دوو هەزار و 393 کەس مافی دەنگدانیان هەیە کە لە 565 بنکەی 15 پارێزگای عێراق و سێ پارێزگای هەرێمی کوردستان دەنگ دەدەن و ئەو بنکانەش 2367 وێستگەی دەنگدان لەخۆدەگرن.

 

هەڵبژاردنی گشتیی ئەنجوومەنی پارێزگاکانی عێراقیش 18ـی ئەم مانگە بەڕێوەدەچێت کە بەگشتی بە دەنگدەرانی تایبەت و ئاوارەوە، 16 ملیۆن و 158 هەزار و 788 کەس مافی دەنگدانیان هەیە.