بەهۆی بارانی بەخوڕەوە دیواری یەکێک لە خانووەکانی قەڵای هەولێر رووخا

 

ئەمڕۆ شەممە، 17-02-2024، بەشێک لە دیواری یەکێک لە خانووەکانی قەڵای هەولێر رووخا و دوای بڕینی پەرژینەکانی دەوری قەڵاکە، بەشێکی کەوتە سەر شەقام و بەر ئۆتۆمبێلێک کەوت.

 

دڵنیا رەحمان، پەیامنێری تۆڕی میدیایی رووداو لە نزیک قەڵای هەولێر و لە شوێنی رووداوەکە گوتی، ''ئەوەی هەیە بەشێکی بچووک لە بەرد و پێکهاتەی دیوارێک هاتووەتە سەر شەقامەکە، ئەوەش بەهۆی بارانبارینەوە بووە''. 

 

پێکهاتەی ئەو بەشەی چووەتە سەر شەقامەکە خشت و چیمەنتۆیە و وا دیارە بەهۆی کۆنبوونییەوە ئەو پێکهاتەیە لاواز بووە و دوای بارانبارین لە جێگەی خۆی خزیوە.

 

شایەتحاڵێک لەبارەی چۆنیێتیی کەوتنەخوارەوەی بەردەکە بە رووداوی گوت، ''بەردەکە بەر ئۆتۆمبێلێک کەوت، بەڵام باش بوو شۆفێرەکەی تێدا نەبوو و تەنیا زیان بەر ئۆتۆمبێلەکە کەوت''.

 

ئەو شایەتحاڵە دەشڵێت، ''ئەمە جاری یەکەم نییە و پێشتریش رووداوی لەم شێوەیە روویداوە، بەڵام ئەم جارەیان زۆر زیاتر بوو".