لە سنە سێ کەس بە رووداوی هاتووچۆ گیانیان لەدەستدا

 

 

رووداوەکە رۆژی پێنجشەممە 16-05-2024 لەنێوان دوو ئۆتۆمبێلی جۆری پراید و پیژۆ پارس لەسەر رێگەی مەریوان - سنە روویدا.

 

عیسا گەوهەری، بەڕێوەبەری پۆلیسی هاتووچۆی پارێزگاکە رایگەیاند، شۆفێر و دوو سەرنشینی پرایدەکە دەستبەجێ گیانیان لەدەستداوە و بریندارەکانیش گواستراونەتە بۆ نەخۆشخانە.

 

بە گوتەی عیسا گەوهەری هۆکاری رووداوەکە تیژڕۆیی یەکێک لە ئۆتۆمبێلەکان و لادان بۆ سایدی بەرامبەر بووە.

 

ساڵانە ژمارەیەکی زۆری خەڵک بەهۆی رووداوەکانی هاتووچۆ لە رۆژهەڵاتی کوردستان و ئێران گیان لەدەستدەدەن.

 

رۆژی 7ی نیسانی 2024 ئەحمەد شیرانی، بەڕێوەبەری ناوەندی زانیاری و کۆنترۆڵی ترافیکی پۆلیسی هاتووچۆی ئێران رایگەیاند، لە سەرەتای نەورۆزەوە تائێستا 100 هەزار رووداوی هاتووچۆ لەو وڵاتە روویانداوە و بەهۆیەوە 813 کەس گیانیان لەدەستداوە و 21 هەزار و 441 کەسیش بریندار بوونە.