تورکیا و پەکەکە ئاماری نوێی شەڕ بڵاودەکەنەوە

 

 

بەگوێرەی راگەیێندراوەکەی هەپەگە، گەریلاکانی پەکەکە لە 24 کاژێری رابردوودا لە ناوچەکانی مەتین و زاپ لە هەرێمی کوردستان رووبەڕووی هێزەکانی سوپای تورکیا بوونەتەوە.

 

وەک لە راگەیێندراوەکەدا هاتووە، لە ئەنجامی شەڕ و پێکدادان و رووبەڕووبوونەوەکان، پێنج سەربازی سوپای تورکیا کوژراون و دوو سەربازی دیکەش برینداربوون. 

 

وەزارەتی بەرگریی تورکیاش ئەمڕۆ پێنجشەممە، 17-8-2023 لە هەژماری تایبەتی خۆی لە تۆڕی کۆمەڵایەتیی ئێکس (تویتەری پێشوو) راگەیێندراوێکی بڵاوکردەوە و گوتی، لە رووبەڕووبوونەوەیەکیاندا لە ناوچەی زاپ لە هەرێمی کوردستان، دوو گەریلای پەکەکە گیانیان لەدەستداوە. 

 

ئەم شەڕ و پێکدادانە لە چوارچێوەی ئۆپەراسیۆنێکدایە تورکیا ناوی ناوە چنگ- قوفڵ کە بەرەبەیانی رۆژی 18ـی نیسانی 2022 لە ناوچەکانی ئاڤاشین، مەتین و زاپ لە خاکی هەرێمی کوردستان بۆ سەر پێگەکانی پەکەکە دەستیپێکرد.

 

وەزارەتی بەرگریی تورکیا گیانلەدەستدانی 624 گەریلا و کوژرانی 101 سەربازی سوپای وڵاتەکەی راگەیاندووە؛ هەپەگەش کوژرانی دوو هەزار و 996 سەربازی تورکیا و گیانلەدەستدانی 361 گەریلای راگەیاندووە.